Шымкент қаласы соңғы жылдары еліміздің қарқынды дамып келе жатқан өндірістік орталықтарының біріне айналды. Инвестициялық жобалардың жүйелі жүзеге асырылуы, жаңа кәсіпорындардың ашылуы және индустриялық инфрақұрылымның кеңеюі өңір экономикасының тұрақты өсіміне ықпал етіп келеді. Өңдеу өнеркәсібіне басымдық беру арқылы қала ішкі нарықты сапалы отандық өніммен қамтамасыз етіп қана қоймай, импортты алмастыру және экспорттық әлеуетті арттыру бағытында да маңызды нәтижелерге қол жеткізуде.
Шымкентте іске қосылып жатқан өндіріс орындары әртүрлі салаларды қамтиды. Қағаз және қаптама өндірісі, құрылыс материалдары, металл өңдеу, керамика және басқа да бағыттар бойынша жүзеге асырылып жатқан инвестициялық жобалар қаланың өнеркәсіптік құрылымын әртараптандыруға мүмкіндік беріп отыр. Бұл өңір экономикасының тұрақтылығын күшейтіп, өндірістік әлеуеттің жаңа деңгейге көтерілуіне жол ашуда.
Соңғы уақытта пайдалануға берілген кәсіпорындардың бірі – «Shymkent Qagazy» жауапкершілігі шектеулі серіктестігі. Кәсіпорын макулатураны қайта өңдеп, картон қаптама өнімдерін шығарады. Жобаның инвестициялық көлемі 2,5 млрд теңгені құрайды. Зауыттың жылдық өндірістік қуаты 10 мың тонна өнім өндіруге мүмкіндік береді. Бұл жоба Қазақстанның оңтүстік өңірлерін сапалы қаптама өнімдерімен қамтамасыз етуге және қайта өңдеу өнеркәсібін дамытуға бағытталған.
Өндірістік инфрақұрылымды дамыту мақсатында «Жұлдыз» индустриялық аймағында жүзеге асырылып жатқан «ORDA NS BUILDING» жобасының да маңызы зор. Жалпы инвестиция көлемі 13 млрд теңгені құрайтын жоба аясында шағын және орта бизнеске арналған дайын өндірістік ғимараттар салынуда. Жалпы аумағы 50 мың шаршы метрге дейінгі өндірістік алаңдар кәсіпкерлердің жаңа өндірістерді қысқа мерзімде іске қосуына мүмкіндік береді.
Металл өңдеу саласында «Himmel Aluminium» зауыты алюминий профильдерін өндіруге маманданған. Жобаның инвестициялық құны 3,5 млрд теңгені құрайды. Кәсіпорын толық өндірістік қуатына шыққан кезде жылына 3,8 мың тоннаға дейін алюминий профильдерін шығаратын болады. Бұл құрылыс және өңдеу өнеркәсібінде қолданылатын өнімдердің импортын азайтуға мүмкіндік береді.
Құрылыс материалдары өндірісіндегі ірі жобалардың бірі – «Wan Sheng Ceramic» кәсіпорны. Жобаның жалпы құны 25,5 млрд теңгені құрайды. Кәсіпорын тәулігіне 25 540 шаршы метр керамогранит өндіруге қауқарлы. Бүгінде жобаның алғашқы кезеңі іске қосылып, өндіріс жолға қойылған. Толық жүзеге асқаннан кейін бұл жоба еліміздегі құрылыс материалдары өндірісінің көлемін ұлғайтуға және ішкі нарықты сапалы өніммен қамтамасыз етуге мүмкіндік береді.
Сарапшылардың пікірінше, осындай өндірістік жобалардың іске асырылуы Шымкент қаласының индустриялық дамуына ұзақ мерзімді серпін береді. Жаңа кәсіпорындардың ашылуы өндірісті әртараптандыруға, инвестиция тартуға, өңдеу өнеркәсібінің үлесін арттыруға және отандық өнімнің бәсекеге қабілеттілігін күшейтуге ықпал етеді. Нәтижесінде Шымкент Қазақстанның жетекші өндірістік және инвестициялық орталықтарының бірі ретіндегі өз позициясын нығайтып келеді.
