Түркістан қаласында инвестиция тарту, жаңа кәсіпкерлік нысандарын іске қосу және қызмет көрсету нарығын кеңейту бағытындағы жұмыстар жалғасуда. Қаладағы «Turan» арнайы экономикалық аймағының аумағында жүзеге асырылып жатқан ірі жобалардың бірі – «Turan» аквапарк – су саябағы. Жоба Түркістанның туристік инфрақұрылымын толықтырумен қатар, қаладағы кәсіпкерлік белсенділікті арттыруға және жаңа экономикалық мүмкіндіктер қалыптастыруға бағытталған.
Жобаны «Turkistan Onelee Cultural Tourism Investments Co. Ltd.» компаниясы жүзеге асыруда. Инвестицияның жалпы көлемі 13,4 млрд теңгені құрайды. Осындай ауқымды жеке инвестицияның Түркістан қаласына бағытталуы қаланың бизнес жүргізу және жаңа жобаларды іске асыру үшін тартымды аумақ ретінде қалыптасып келе жатқанын көрсетеді.
Кешеннің жалпы аумағы 11,7 гектарды құрайды. Жоба үш кезең бойынша жүзеге асырылады. Құрылыстың алғашқы кезеңі биыл наурыз айында басталып, оны тамыз айында аяқтап, пайдалануға беру жоспарланған. Қазіргі таңда бірінші кезеңдегі құрылыс жұмыстары аяқталуға жақын.
Алғашқы кезеңде келушілерді қабылдау және тіркеу ғимараты, киім ауыстыру орындары, су аттракциондары, шомылу аймағы мен айналмалы аквапарк іске қосылады. Кейінгі кезеңдерде кешеннің қызмет ауқымы кеңейіп, отбасылық демалыс орындары, қонақ үй, мейрамхана, заманауи су аттракциондары және алып толқын бассейндерін салу көзделген. Құрылыс жұмыстарын 2028 жылы толық аяқтау жоспарланып отыр.
Жобаның кәсіпкерлік үшін маңызы кешен аумағындағы нысандармен ғана шектелмейді. Жылына 200 мыңға дейін келушіні қабылдайтын ірі нысанның іске қосылуы Түркістандағы қоғамдық тамақтану, қонақ үй, бөлшек сауда, көлік, логистика және басқа да сервистік қызметтерге қосымша сұраныс қалыптастырады. Бұл жергілікті шағын және орта бизнес субъектілерінің қызметін кеңейтуіне мүмкіндік береді.
Кешеннің құрылысы мен кейінгі қызметі отандық тауар өндірушілер үшін де жаңа нарық қалыптастыра алады. Құрылыс материалдары, жиһаз, азық-түлік, тұрмыстық және сервистік өнімдер, техникалық қызмет көрсету секілді бағыттар бойынша жергілікті кәсіпорындарды тарту қазақстандық қамту үлесін арттыруға ықпал етеді. Осылайша ірі инвестициялық жобаның экономикалық тиімділігі оның айналасындағы кәсіпкерлік байланыстар арқылы еселене түседі.
«Turan» арнайы экономикалық аймағында мұндай жобаның жүзеге асырылуы да маңызды. Арнайы экономикалық аймақтың негізгі міндеттерінің қатарында инвестициялар тарту, жаңа өндірістер мен қызметтерді дамыту, заманауи технологияларды енгізу және қосымша жұмыс орындарын қалыптастыру бар. Сондықтан ірі инвесторлардың АЭА аумағында жобаларды жүзеге асыруы Түркістан қаласының инвестициялық әлеуетін тиімді пайдалануға мүмкіндік береді.
Жоба толық іске қосылғаннан кейін жаңа жұмыс орындары ашылады. Сонымен қатар кешенге қызмет көрсететін кәсіпорындар мен жеткізушілер есебінен жанама жұмыспен қамту мүмкіндігі де кеңейеді. Бұл қала тұрғындарының кәсіпкерлікке араласуына және қызмет көрсету саласында жаңа бизнес бастамалардың пайда болуына жағдай жасайды.
Келушілер санының артуы ішкі нарықтағы тұтынушылық белсенділікке де оң әсер етеді. Аквапаркке келген азаматтар қаладағы қонақ үйлерді, мейрамханаларды, сауда орындарын, такси және басқа да қызметтерді пайдаланады. Нәтижесінде инвестициялық жобадан түсетін экономикалық әсер Түркістандағы басқа кәсіпкерлік субъектілеріне де таралады.
Мұндай жобалар қаладағы бәсекелестік ортаның дамуына да ықпал етеді. Қызмет көрсету саласында жаңа әрі заманауи нысандардың пайда болуы кәсіпкерлерді сервисті жетілдіруге, тұтынушыларға жаңа ұсыныстар жасауға және қызмет сапасын көтеруге ынталандырады. Бұл түптеп келгенде Түркістанның ішкі нарығының сапалы дамуына мүмкіндік береді.
«Turan» аквапарк – су саябағының құрылысы Түркістан қаласында инвестициялық жобалардың экономиканың бірнеше саласына қатар әсер ете алатынын көрсететін мысалдардың бірі. 13,4 млрд теңгелік инвестиция жаңа туристік нысан салуға ғана емес, кәсіпкерлік ортаны кеңейтуге, жаңа жұмыс орындарын құруға және жергілікті бизнес үшін қосымша нарық қалыптастыруға мүмкіндік береді.
Алдағы уақытта осындай инвестициялық бастамалардың көбеюі Түркістан қаласының іскерлік тартымдылығын арттырып, отандық кәсіпкерліктің жаңа бағыттарда дамуына, ішкі нарықтың кеңеюіне және қазақстандық тауарлар мен қызметтердің үлесін ұлғайтуға серпін бермек.
