Шымкентте құрылыс саласының дамуы тек жаңа нысандар салумен шектелмей, құрылысқа қажетті материалдардың жергілікті өндірісін қалыптастырумен қатар жүріп келеді. Бұл кәсіпорындарға өндірістік процесті тиімді ұйымдастыруға, қажетті материалдарға деген сұранысты өз күшімен қамтамасыз етуге және отандық өндірістің үлесін арттыруға мүмкіндік береді.
Осындай тәжірибемен Шымкент қалалық Кәсіпкерлер палатасы жанындағы Өңірлік кеңестің мүшелері кезекті көшпелі отырыс барысында танысты. Кеңес мүшелері еліміздегі ірі құрылыс компанияларының бірі – «Береке А» корпорациясының өндірістік алаңында болды.
1998 жылы құрылған компанияның негізгі бағыттарының бірі – жол құрылысы. Кәсіпорын еліміздің әр өңірінде жол инфрақұрылымы нысандарын жүзеге асырып, асфальт-бетон өнімдері мен көпір құрылысы бағытында жұмыс істеп келеді. Шымкентте де ірі жол және жол-өткел жобаларына қатысуда.
Компания қызметінің маңызды ерекшелігі – құрылыс жұмыстарын орындаумен қатар қажетті материалдардың бір бөлігін өз өндірісінде шығаруы. Кәсіпорын жол құрылысына пайдаланылатын асфальт пен басқа да материалдарды өзі өндіреді.
Мұндай өндірістік модель құрылыс бизнесі үшін бірнеше артықшылық береді. Материалды сырттан толық көлемде сатып алуға тәуелділіктің азаюы жеткізу процесін бақылауға, өндірістік жоспарды тиімді ұйымдастыруға және құрылыс жұмыстарының үздіксіз жүруіне жағдай жасайды. Сонымен қатар материал сапасын өндіріс кезеңінен бастап бақылауға мүмкіндік береді.
Кәсіпорында бүгінде 400 адам жұмыс істейді. Бұл құрылыс индустриясының қаладағы жұмыспен қамтуға қосатын үлесін көрсетеді. Жол салу мен материал өндірудің бір кәсіпорын аясында қатар дамуы әртүрлі техникалық мамандықтарға сұраныс қалыптастырады.
Өңірлік кеңес мүшелері компанияның күрделі құрылыс жобаларын жүзеге асыру, заманауи технологияларды қолдану, жұмыс орындарын құру және отандық өндірісті дамыту тәжірибесіне назар аударды.
Шымкент үшін құрылыс компанияларының жеке өндірістік базасын қалыптастыруы маңызды. Мұндай кәсіпорындар құрылыс нарығының қажеттілігін қамтамасыз етумен қатар жергілікті өндірісті дамытып, өндірістік тізбектің қала ішінде қалыптасуына ықпал етеді. Нәтижесінде құрылыс саласының өсуі басқа өндірістік бағыттардың дамуына да серпін бере алады.
