Шымкентте шағын кәсіпкерлікті дамытуда жергілікті өнім өндірушілерді қолдауға ерекше көңіл бөлініп келеді. «Бір ауыл – бір өнім» жобасы кәсіпкерлерге өз өнімін танытып қана қоймай, өндірісті кеңейтуге, бренд қалыптастыруға және жаңа нарықтарға шығуға мүмкіндік беретін алаңдардың біріне айналуда.
Шымкент қаласының Кәсіпкерлер палатасында жоба аясындағы бренд-комитеттің кезекті отырысы өтті. Оған қаржы және даму институттарының, кәсіпкерлік және креативті индустрия саласының өкілдері қатысты.
Бұған дейін ұйымдастырылған көрме-жәрмеңкеге 60-қа жуық үміткер қатысқан. Солардың арасынан іріктелген 20 кәсіпкер бренд-комитет алдында өз өнімдерін таныстырды. Нәтижесінде 10 кәсіпкер үздік деп танылды.
Ұсынылған өнімдердің ауқымы Шымкенттегі шағын өндірістің әртүрлі бағытта дамып келе жатқанын көрсетеді. Кәсіпкерлер бал, ет және кондитерлік өнімдер, сүт пен асқабақтан жасалған сусындар, жүгері, қытырлатып кептірілген жемістер өндіреді. Сонымен қатар киім және былғары бұйымдарын дайындайтын кәсіпкерлер де жобаға қатысқан.
Мұндай жобалардың маңызы шағын бизнестің идеясын тұрақты өндіріске айналдыруға мүмкіндік беруінде. Өнімін шағын көлемде шығарып жүрген кәсіпкер үшін өндірісті ұлғайту жаңа жабдық сатып алуды, қаптаманы жетілдіруді, өткізу нарығын кеңейтуді және брендті дамытуды қажет етеді. Бұл кезеңде қаржылық және консультациялық қолдау ерекше маңызды.
Бренд-комитет таңдаған 10 кәсіпкер енді 5 млн теңге көлеміндегі грант конкурсына үміткер ретінде қатыса алады. Сонымен бірге Кәсіпкерлер палатасы тарапынан олардың өндірісін кеңейтуге және қажет болған жағдайда экспорттық нарықтарға шығуына қолдау көрсетіледі.
Жобаның тағы бір маңызды бағыты – жергілікті шикізат пен кәсіпкерлік бастаманы дайын нарықтық өнімге айналдыру. Бұл Шымкентте шағын өндірістердің санын көбейтіп, жергілікті тауарлардың ассортиментін кеңейтуге жағдай жасайды.
«Бір ауыл – бір өнім» жобасы арқылы перспективалы кәсіпкерлерді анықтау және олардың әрі қарай өсуіне қолдау көрсету қаладағы шағын бизнестің сапалы дамуына ықпал етеді. Өндіріс көлемін арттырып, тұрақты өткізу нарығын қалыптастырған кәсіпкерлер болашақта жаңа жұмыс орындарын ашып, Шымкент өнімдерінің басқа өңірлер мен сыртқы нарықтардағы үлесін кеңейте алады.
