Маңызды нысандардың бірі – Мұнайлы ауданында ашылған 150 төсек-орынға арналған жаңа аурухана. Аумағы 30 мың шаршы метрді құрайтын заманауи ғимарат қажетті медициналық жабдықтармен жарақталған. Бұл аудан тұрғындарына медициналық көмек көрсету мүмкіндіктерін кеңейтуге мүмкіндік береді.
Инфрақұрылымды жаңартудың негізгі мақсаты – адамның қай жерде тұратынына қарамастан, сапалы медициналық көмекке тең қолжетімділікті қамтамасыз ету. Бұл әсіресе ауыл тұрғындары мен балалы отбасылар үшін маңызды.
Мемлекет басшысының тапсырмаларын орындау мақсатында жүзеге асырылып жатқан «Ауылдық денсаулық сақтауды жаңғырту» ұлттық жобасының шеңберінде Маңғыстау облысында төрт жаңа дәрігерлік амбулатория салынды. Олар Қарақия ауданындағы Аппақ, Маңғыстау ауданындағы Қосбұлақ, Бейнеу ауданындағы Тәжен ауылдарында және Жаңаөзен қаласына қарайтын Кендірлі елді мекенінде орналасқан. Жаңа амбулаторияларда күндізгі стационарлар, зертханалар, сүзгі-бокстар, дәрігерге дейінгі көмек көрсету, физиотерапия, емдік дене шынықтыру кабинеттері және акушерлік кабинеттер қарастырылған. Осылайша, ауыл тұрғындары профилактика мен алғашқы диагностикадан бастап, емделу және қалпына келтіру көмегіне дейінгі медициналық қызметтердің кең спектрін ала алады.
Балалардың денсаулығына да ерекше көңіл бөлінуде. Бейнеу ауданында ерекше қажеттіліктері бар балаларға арналған «Қамқорлық» оңалту орталығы ашылды. Орталық жылына 600 балаға дейін қабылдауға есептелген. Мұнда әр баланың жеке қажеттіліктерін ескере отырып, 14 күндік кешенді оңалту курстары қарастырылған. Бейнеу ауданының отбасылары үшін бұл, ең алдымен, балаларға қажетті көмекті басқа қалаларға бармай-ақ, тұрғылықты жеріне жақын жерде алу мүмкіндігі.
