«Атамекен» Ұлттық кәсіпкерлер палатасы Басқарма Төрағасының орынбасары Аслан Калигазин Шымкент қаласына жұмыс сапарымен келіп, қалада жүзеге асырылып жатқан бірқатар ірі инвестициялық жобалардың барысымен танысты.
Жұмыс сапары аясында Аслан Калигазин «ALSERA KZ» жылыжай кешенінде, «Қазақстан инновациялық университеті» ЖШС ауруханасының құрылыс алаңында, сондай-ақ «Бал Текстиль», «Еврокристалл» және «Qazalpack» кәсіпорындарында болды. Өндірістік нысандарда инвесторлармен кездесіп, жобалардың жүзеге асырылу барысы мен кәсіпорындардың қазіргі қызметімен танысты.
Кездесулер барысында инвесторлардың алдында тұрған мәселелерге ерекше назар аударылды. Атап айтқанда, орталық деңгейде шешуді қажет ететін әкімшілік кедергілер мен проблемалық мәселелер көтеріліп, оларды шешудің ықтимал жолдары талқыланды.
Шымкент үшін инвестициялық жобаларды іске қосумен қатар оларды жүзеге асыру барысында жүйелі сүйемелдеу де маңызды. Өйткені өндірістік жобалардың дамуына қаржыландыру мен инфрақұрылым ғана емес, рұқсат беру рәсімдері, мемлекеттік органдармен өзара іс-қимыл және әкімшілік мәселелердің уақытылы шешілуі де әсер етеді.
Сапар барысында Шымкент қаласының прокуратурасы және «Оңтүстік» арнайы экономикалық аймағы өкілдерінің қатысуымен кеңес өтті. Жиында қаладағы инвестициялық ахуал, кәсіпкерлік субъектілерінің қызметіне қатысты мәселелер және инвесторларға қолайлы жағдай қалыптастыру бағытындағы жұмыстар қаралды.
Кәсіпорындарға тікелей бару бизнес өкілдерінің мәселелерін өндіріс орнында талқылауға мүмкіндік береді. Ал жергілікті деңгейде шешілмейтін мәселелерді «Атамекен» ҰКП арқылы республикалық деңгейге шығару кәсіпкерлер мен инвесторлардың мүддесін қорғаудың практикалық тетіктерінің бірі болып саналады.
Шымкентте жылыжай шаруашылығынан бастап жеңіл өнеркәсіп, шыны және қаптама өндірісі мен медицина саласына дейін әртүрлі бағыттағы инвестициялық жобалар жүзеге асырылуда. Сондықтан инвесторларды жүйелі сүйемелдеу және бизнестің дамуына кедергі келтіретін мәселелерді анықтау қаланың инвестициялық мүмкіндіктерін тиімді пайдалануда маңызды рөл атқарады.
Мұндай жұмыс кездесулері Шымкенттегі кәсіпорындардың нақты қажеттіліктерін анықтап, инвестициялық жобаларды іске асыруға қолайлы жағдай қалыптастыруға бағытталған.
