Шымкентте медициналық кәсіпкерлік субъектілерінің құқықтарын қорғау және міндетті әлеуметтік медициналық сақтандыру жүйесіндегі даулы мәселелерді шешу бағытында кезекті талқылау өтті. Кәсіпкерлер палатасының алаңында Қ.Акеновтің төрағалығымен Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің отырысы ұйымдастырылды.
Жиынға Әлеуметтік медициналық сақтандыру қоры филиалының, Денсаулық сақтау басқармасының, Медициналық және фармацевтикалық бақылау департаментінің, прокуратура мен Экономикалық тергеп-тексеру департаментінің өкілдері, сондай-ақ стоматологиялық ұйымдардың басшылары қатысты.
Талқылаудың негізгі тақырыбы – МӘМС қорының стоматологиялық ұйымдарға қатысты 2023-2025 жылдар аралығында жүргізген жоспардан тыс мониторингінің нәтижелері. Мониторинг шеңберінде 16 клиника бойынша жалпы сомасы шамамен 126,5 млн теңгені құрайтын 11,5 мыңнан астам ақау анықталған.
Кәсіпкерлер тарапынан көтерілген мәселенің бірі мектеп жасындағы балалардың уақытша тістерінің пульпитін емдеу кезінде медициналық кодтарды қолдану тәртібіне қатысты болды. Атап айтқанда, D03.004.001 және D03.005.001 кодтарын пайдалану және көрсетілген қызметтерді 3.2 ақауы ретінде саралау мәселесі қаралды.
Кеңес мүшелері мұндай жағдайларды бағалау кезінде тек баланың жасына сүйену жеткіліксіз екенін атап өтті. Қолданылған медициналық кодтың дұрыстығын анықтау барысында тістің түрін, қойылған диагнозды, нақты көрсетілген медициналық қызметті және бастапқы құжаттаманы кешенді түрде ескеру ұсынылды.
Сонымен қатар МӘМС қорының Шымкент қаласы бойынша филиалына 2023-2025 жылдары стоматологиялық ұйымдарға жүргізілген жоспардан тыс мониторингтің құқықтық негіздемесін ұсыну жөнінде ұсыныс берілді.
Мәселе жергілікті деңгеймен шектелмейді. Шымкент қаласының Кәсіпкерлер палатасына оны республикалық деңгейде қарау үшін «Атамекен» Ұлттық кәсіпкерлер палатасына тиісті хат жолдау тапсырылды.
Мұндай талқылаулар медициналық қызмет сапасына қойылатын талаптарды сақтай отырып, кәсіпкерлердің заңды мүдделерін қорғаудың да маңызын көрсетеді. Мемлекеттік органдар, МӘМС қоры және медициналық бизнес арасындағы ашық диалог даулы мәселелерді жан-жақты қарауға және саладағы талаптарды қолданудың бірыңғай тәжірибесін қалыптастыруға мүмкіндік береді.
