Күн суыта бастаған кезде ТЖМ құтқару бөлімшелері күрделі ауа райы жағдайында жұмыс істеуге дайындалады. Қар жаууы, боран мен көктайғақ автожолдардағы қозғалысты қиындатуы мүмкін. Төтенше жағдайларға жедел ден қою үшін ТЖМ қызметкерлері автокөліктердің техникалық жай-күйін, құтқару жабдықтары мен байланыс құралдарын алдын ала тексереді, деп хабарлайды No-comment.kz - ҚР Төтенше жағдайлар министрлігіне сілтеме жасап.
Жолсыз жерлерде құтқарушылардың көмекшілерінің бірі – ТЖД жедел-құтқару жасақтарының жарағында тұрған «ТРЭКОЛ» жол талғамайтын көлігі. Оның басты артықшылығы – жоғары өтімділігі. Төмен қысымды дөңгелектерінің арқасында көлік қар басқан учаскелерде, ойлы-қырлы жерлерде және қарапайым көліктердің жүруі қиындаған жолдарда қозғала алады. Мұндай техника әсіресе қыста, қатты боран мен қарлы үйінділер салдарынан автожолдардың жекелеген учаскелеріне жету қиындаған кезде аса қажет.
Техниканы дайындау маусым басталар алдындағы бір реттік тексерумен шектелмейді. Оның жарамдылығы мен шақыртуға шығуға әзірлігін сақтау құтқару бөлімшелерінің күнделікті жұмысының бір бөлігі болып табылады. Міндеттерді орындағаннан кейін автокөліктер тексеріліп, жабдықтардың жай-күйі бағаланады. Қажет болған жағдайда техникалық қызмет көрсету және анықталған ақауларды жою жұмыстары жүргізіледі.
Қысқы боран кезінде автожолдарда қар үйінділері жиі пайда болады. Мұндай жағдайда құтқару техникасының дайын болуы ерекше маңызға ие. Осындай жағдайларда ТЖМ бөлімшелері жүргізушілер мен жолаушыларға көмек көрсетуге, қауіпті учаскелерден адамдарды эвакуациялауға және авариялық-құтқару жұмыстарын жүргізуге жұмылдырылуы мүмкін.
Қазақстан ТЖМ аумақтық бөлімшелері ауа райының қолайсыздығына байланысты туындауы мүмкін төтенше жағдайларға ден қою үшін күштер мен құралдардың дайындығын қамтамасыз ету шараларын алдын ала қабылдайды.
