Алматы қаласының еңбек инспекциясы басқармасы жыл басынан бері 230 жоспардан тыс тексеру жүргізіп, бірқатар заңбұзушылықты анықтаған, деп хабарлайды NO-COMMENT.KZ тілшісі.
«Тексеріс барысында 112 заңды тұлғаға 20,4 млн теңге, жалақыны уақтылы төлемеген 82 заңды тұлғаға 13,3 млн теңге көлемінде айыппұл салынып, әкімшілік жауапқа тартылды. 177 кәсіпорында 116,4 млн теңге жалақы сомасы бойынша берешек өтелді, жиыны 764 қызметкердің еңбек құқықтары қорғалды», - деді Алматы қаласы еңбек инспекциясы басқармасының басшысы - бас мемлекеттік еңбек инспекторы Еркінбек Әмірғалиев өңірлік коммуникациялар қызметінің алаңында.
Ол сондай-ақ, қала кәсіпорындарында 30 жазатайым оқиға болғанын айтты.
«Бұл ретте 31 адам зардап шеккен, оның ішінде 4 адам қаза тапты, 9 адам ауыр, 18 адам жеңіл жарақат алған. Айта кетейін, Алматыда 113 916 кәсіпорын жұмыс істейді, жалдамалы қызметкерлер саны – 897 925 адам», - деді Бас мемлекеттік еңбек инспектор Еркінбек Әмірғалиев.
