Аудан әкімі Арман Абдуллаевтың өткен есепті кездесуінде Жартытөбе ауылдық округінің тұрғындары бірқатар өзекті мәселелер көтерген болатын. Халық сұранысынан кейін «Ауыл-Ел бесігі» бағдарламасы аясында Құрама елді мекенінде спорт кешені құрылыстары жүргізілуде. Құрама елді мекендерінің ауыз су жүйелерінің құрылыс жұмыстары басталды. Сондай-ақ, ағымдағы жылы Төңкеріс, Құрама, Достық, Бостандық елді мекендерінде жалпы 7 көшеге орташа жөндеу жұмыстарын жүргізу жоспарлануда. Бұл туралы аудан әкімі Арман Абдуллаев Жартытөбе ауылдық округі тұрғындарымен кездесуінде мәлімдеді.
- Құрметті ауыл тұрғындары, өздеріңіз көріп отырғандай, аудан әлеуметтік-экономикалық даму үстінде. Аудандағы өзекті мәселелерді шешуге және ауданның дамуына сіздермен бірге жүйелі шаралар қабылдайтын боламыз. Өткен есепті кездесуде көтерілген мәселелердің барлығы ауданның даму жол картасына енгізілген. Алдағы уақытта бюджеттің мүмкіншілігіне қарай, кезең-кезеңімен тиісті жүйелі жұмыстар жүргізілетін болады,-деп түйіндеді сөзін аудан басшысы.
Кездесуде тұрғындар тарапынан жол жөндеу, таза ауыз сумен қамтамасыз ету, дәрігерлік амбулатория, каналды механикалық тазалаудан өткізу, жол белгілерін орнату, аяқ жол және жеке мәселелері бойынша сұрақтар қойылып, өтініштер айтылды. Әр тұрғынның мәселесін мұқият тыңдаған аудан басшысы әрбір ұсыныс пен өтініш хаттамаға енгізіліп, алдағы уақытта тиісті жұмыс жүретінін айтты. Ашық пікір алмасу өтіп, күрделі мәселелердің түйіні тарқатылды.
Кездесуден кейін, аудан басшысы тұрғындарды жеке мәселелерімен қабылдап, талап-тілектерін тыңдап, заң аясында жауап берді.
Аудан басшысы тұрғындар тарапынан көтерілген әрбір мәселе назарға алынып, алдағы уақытта заңға сәйкес тиісті жұмыстар атқарылатынын жеткізді.
САРЫАҒАШ: АУДАН ӘКІМІ АРМАН АБДУЛЛАЕВ ТҰРҒЫНДАРДЫҢ ТАЛАП-ТІЛЕКТЕРІН ТЫҢДАДЫ
