Түркістан облысында халықты табиғи газбен қамтамасыз ету бағытында ауқымды жұмыс атқарылуда. Биылдың өзінде өңірде 64 газдандыру жобасы жүзеге асырыла бастады. Бұл — өңірдің әлеуметтік-экономикалық дамуы мен халықтың өмір сапасын арттыруға бағытталған маңызды қадам.
Облыс әкімінің төрағалығымен өткен арнайы жиында 2024 жылы атқарылған жұмыстар мен өзекті мәселелер егжей-тегжейлі талқыланды. Жиын барысында әкім Нұралхан Көшеров аудан, қала әкімдеріне нақты міндеттер жүктеп, халықты газбен қамту жұмысын тек құбыр тартумен шектемей, тұрғын үйлерді нақты қосу процесіне баса назар аударуды тапсырды.
Биылдың өзінде 34 елді мекенде 38 жобаның құрылысы аяқталады деп күтілуде. Тағы 16 елді мекендегі 26 жоба 2025 жылға өтпелі болады. Бұл дегеніміз — алдағы уақытта өңірдің бірнеше ауданы газбен қамтылу жағынан жаңа деңгейге көтерілмек. Дегенмен, газдандыру жұмыстары баяу жүріп жатқан Арыс, Кентау қалалары мен Отырар, Сауран, Ордабасы аудандары әкімдерінің жұмысы сынға алынды. Ал Созақ ауданына газ әлі жетпеген. Ондағы құрылыс жұмыстары аяқталғанымен, Жамбыл облысындағы «Еврохим-Қаратау» нысанымен қосылу мәселесі шешілмей отыр.
Облыстық энергетика және тұрғын үй-коммуналдық шаруашылық басқармасының мәліметінше, бүгінгі таңда Түркістан облысында 563 елді мекен немесе 85,5% халық табиғи газбен қамтылған. Бұл көрсеткіш республика бойынша 8-орында тұр. Дегенмен, жалпы елді мекен санына шаққанда газдандыру деңгейі 69,7%-ды ғана құрайды. Сондықтан 2027 жылға дейін бұл көрсеткішті 765 елді мекенге жеткізу жоспарланып отыр. Ол үшін қосымша қаржы мен тиімді жобалық жоспарлау қажет.
Газдандыру тек әлеуметтік жағдайды жақсартуға ғана емес, өңірдің экономикалық әлеуетін арттыруға да ықпал етеді. Түркістан қаласының өзінде жаңа өндіріс орындарының ашылуына байланысты табиғи газға деген сұраныс күрт артты. Қазіргі таңда қаланы газбен қамтамасыз етіп отырған №15 «Түркістан» автоматтандырылған газ тарату станциясы жүктемелік режимде жұмыс істеуде. Осыған байланысты жаңа АГТС орнату және айналма газ құбырын тарту жобасы дайындалуда. Бұл жоба қаланың болашақтағы қажеттіліктерін өтеуге мүмкіндік береді.
Жиында сонымен қатар газдандыру нысандарын «Qazaq Gaz Aimaq» АҚ теңгеріміне өткізу, жобалық-сметалық құжаттардың сапасын арттыру және тиімсіз жобаларды болдырмау мәселелері де сөз болды. Облыс басшылығы халықтың газға нақты қосылуын бақылауда ұстап, әрбір жобаның тиімді орындалуына ерекше көңіл бөлетінін мәлімдеді.
Қорыта айтқанда, Түркістан облысында газдандыру — өңірлік даму саясатының басым бағыттарының бірі. Жоспарлы жұмыстар арқылы тұрғындардың өмір сүру сапасын арттырумен қатар, экология мен энергия тиімділігіне де оң ықпал етіледі.
