Түркістан облысында Үкіметтің инвестициялық жобаларды жүйелеу жөніндегі тапсырмасына сәйкес бірқатар ауқымды жұмыстар қолға алынуда. Өңірге кіріп жатқан импорт тауарларына кешенді талдау жүргізіліп, отандық өндірісті дамыту және шетелге тәуелділікті төмендету бағытында жаңа жобалар кезең-кезеңімен жүзеге асады.
Облыс әкімдігі осы бастаманы басым бағыт ретінде қарастырып, өндіріс көлемін арттыру мен ауыл шаруашылығы өнімдерін терең өңдеуге ден қоюда. Аппарат мәжілісінде бұл мәселе облыс әкімі Нұралхан Көшеровтің төрағалығымен кеңінен талқыланды. Жиында өңір басшысы жергілікті өнім көлемін арттырып, ішкі нарықты отандық тауарлармен толық қамтамасыз етудің маңыздылығын атап өтті. Сонымен қатар, Түркістан облысының табиғи және экономикалық әлеуеті ауыл шаруашылығы мен жеңіл өнеркәсіп салаларын дамытуға қолайлы екенін еске салды.
Кәсіпкерлік және өнеркәсіп басқармасының деректеріне сүйенсек, облыста импортты алмастыратын 6 сала мен 31 өнім түріне талдау жүргізіліп, нақты 65 инвестициялық жоба әзірленген. Бұл жобалар кезең-кезеңімен жүзеге аспақ: 28 жоба 2025 жылы, 26 жоба 2026 жылы, ал 11 жоба 2027 жылға жоспарланған. Жалпы инвестиция көлемі 707 млрд теңгеден асады және бұл көрсеткіш алдағы уақытта өседі деп күтілуде.
Аталған жобалардың ішінде алюминий профильдерін, жиһаз, өнеркәсіптік тоңазытқыш құрылғыларын шығару секілді өндірістер бар. Мәселен, «Жасыл Суық Қазақстан» компаниясы өз қуатына толық енгенде, елімізге өнеркәсіптік тоңазытқыштарды шеттен әкелу көрсеткіші 48 пайызға қысқарады. Сонымен қатар сыртқы бейнебақылау камераларын өндіретін жаңа зауыт іске қосылмақ. Бұл тек ішкі сұранысты қанағаттандырып қоймай, болашақта экспорттық әлеуетті де арттырады.
Көкөніс кептіру, жеміс-жидекті қайта өңдеу, ауыл шаруашылығы техникаларын шығару, жылу құбырларын өндіру және басқа да бағыттарда жаңа өндіріс орындарын ашу көзделіп отыр. Бұл жобалар бір жағынан жұмыс орындарын көбейтсе, екінші жағынан, аймақтың экономикалық тәуелсіздігін нығайтады.
Ауыл шаруашылығы саласында да импортқа тәуелділікті төмендету жолында нақты істер атқарылуда. Ауыл шаруашылығы министрлігі бекіткен негізгі 10 бағыт аясында Түркістан облысында сүт және ет өнімдерін терең өңдеуге арналған кәсіпорындар іске қосылып жатыр. Сонымен қатар, құс шаруашылығын дамыту, көкөніс сақтайтын қоймалар салу және ауыл шаруашылығы өнімдерін ұзақ мерзімге сақтайтын инфрақұрылымды кеңейту жұмыстары қарқын алуда.
Файзулла Байдуллаевтың айтуынша, осы бастамалар импорт көлемін қысқартумен қатар, ет және сүт өнімдері экспортының да артуына мүмкіндік береді. Агроөнеркәсіптік кешеннің қуатын тиімді пайдалану арқылы өңірдің азық-түлік қауіпсіздігі күшейеді.
Жалпы алғанда, Түркістан облысында экономиканы әртараптандыру, жергілікті өнімге сұранысты арттыру және сыртқы нарыққа отандық өнімді экспорттау жұмыстары кезең-кезеңімен жолға қойылуда. Бұл бастамалар Қазақстанның ұлттық өндірістік қуатын арттырып, өңірлердің экономикалық дербестігін қамтамасыз етуге бағытталған нақты қадамдар болып отыр.
