Шымкент қаласында биыл 770 жұмыссыз азаматты кәсіптік оқытудан өткізу көзделіп отыр. Бұл бастама ҚР Премьер-Министрінің орынбасары – Еңбек және халықты әлеуметтік қорғау министрінің 2023 жылғы 22 маусымдағы №231 бұйрығына сәйкес жүзеге асырылуда. Мақсат – еңбек нарығындағы сұранысқа сай мамандар даярлау арқылы жұмыссыздық деңгейін төмендету және тұрғындарды тұрақты табыс көзімен қамту.
Атап айтқанда, 610 азамат арнайы білім беру ұйымдарында кәсіптік оқудан өтсе, қалған 160 адам тікелей жұмыс берушілердің жұмыс орындарында білім алады. Бұл – теория мен практиканы тиімді ұштастыратын әдіс. Жұмыс берушілер тарапынан кәсіптік оқытуға жоғары қызығушылық байқалды: барлығы 34 жұмыс берушіден 1279 оқыту орнына өтінім түсті. Оның ішінде:
-
18 жұмыс беруші білім беру ұйымдары арқылы 935 орын ұсынды;
-
16 жұмыс беруші өз кәсіпорындарында оқыту үшін 344 орын ұсынды.
Өңірлік комиссия бұл өтінімдерді сараптап, нақты еңбек нарығындағы қажеттіліктерге сәйкес шешім қабылдады. Нәтижесінде:
-
8 мамандық бойынша 16 жұмыс берушінің 292 орны;
-
13 мамандық бойынша 15 жұмыс берушінің 153 орны мақұлданды.
Алайда кейбір өтінімдер талаптарға сәйкес келмегендіктен қабылданбады. Атап айтқанда, білім беру ұйымдарындағы 643 орын мен жұмыс орнындағы 191 орын мақұлданған жоқ. Бұл шешімдер комиссияның кәсіби біліктілікке, оқыту бағдарламасының мазмұнына және оқыту базасына қатысты қойылатын нақты талаптарына негізделген.
Қазіргі таңда оң шешім алған жұмыс берушілермен келісімшарттар жасалып жатыр. Жұмыссыз азаматтарды оқуға жолдау процесі басталып кетті. Оқу мерзімі аяқталған соң қатысушыларға сертификаттар табысталып, жұмысқа орналасуға қолдау көрсетіледі.
Жаңа кәсіп меңгеруге ниетті азаматтар өздері тіркелген мекенжай бойынша аудандық Мансап орталығына барып, алдымен жұмыссыз ретінде тіркелуі қажет. Ресми мәртебе берілгеннен кейін ғана олар кәсіптік оқыту бағдарламасына қатысуға өтінім тапсыра алады. Бұл ретте Мансап орталығы мамандары қажетті кеңес беріп, әр қатысушыны бағыттап отырады.
Бағдарлама – жастар мен еңбекке қабілетті азаматтар үшін үлкен мүмкіндік. Қазіргі таңда Шымкентте құрылыс, өндіріс, сервис, техникалық мамандықтар бойынша сұраныс жоғары. Сондықтан жұмыссыз жүрген азаматтарға осы мүмкіндікті тиімді пайдалануға кеңес беріледі. Мемлекеттік қолдау аясында берілетін білім – болашақ еңбек жолында сенімді қадам болмақ.
