Елордада азаматтардың жекелеген санаттарына көліктік орталықтарға бармай-ақ және құжат жинамай-ақ жеңілдікпен жол жүру билеттерін алу мүмкіндігін беретін жаңа сервис іске қосылды, деп хабарлайды No-comment.kz - ҚР Көлік министрлігіне сілтеме жасап.
Жеңілдіктер сегіз санатты қамтиды: зейнеткерлер, Ұлы Отан соғысы ардагерлері, көпбалалы аналар, ерекше қажеттілігі бар азаматтар, саяси қуғын-сүргін құрбандары, сондай-ақ 18 жасқа дейінгі мектеп оқушылары мен колледж студенттері.
Жоғарыда көрсетілген санаттарға жататын тұрғындар SmartDataUkimet платформасы арқылы автоматты түрде анықталады. Өтініш берудің қажеті жоқ: азаматтарға SMS-хабарлама жолданып, растаудан кейін жеңілдікпен берілетін виртуалды карта бірден Avtobys қосымшасында қолжетімді болады. Жол жүру үшін смартфондағы QR-кодты сканерлеу жеткілікті.
Жоба ҚР Еңбек және халықты әлеуметтік қорғау министрлігі, Астана қаласының Көлік және жол-көлік инфрақұрылымын дамыту басқармасы, «City Transportation Systems» ЖШС, «НИТ» АҚ және «Еңбек ресурстарын дамыту орталығы» АҚ-ның бірлесуімен жүзеге асырылды.
Айта кетейік, қазіргі уақытта «SmartDataUkimet» платформасының жаңа архитектурасына көшуіне байланысты «НИТ» АҚ техникалық жұмыстар жүргізіп жатыр. Жүйені толық іске қосу 2025 жылдың қыркүйегіне жоспарланған.
Жаңа формат қызмет көрсетуді анағұрлым ашық әрі ыңғайлы етеді: кезектер жойылады, орталықтарға бару қажеттілігі азаяды, ал халыққа қызмет көрсету жылдамдығы мен сапасы артады.
