2025 жылғы 29 тамызда Қазақстан Республикасының Экология және табиғи ресурстар министрі Ерлан Нысанбаев Іле-Алатау мемлекеттік ұлттық табиғи паркі нысандарын аралады, деп хабарлайды No-comment.kz - ҚР Экология және табиғи ресурстар министрлігіне сілтеме жасап.
Жұмыс сапары аясында Министр «Алма-Арасан» және «Бутаковка» автоматтандырылған бақылау-өткізу бекеттерінің жұмысымен танысты. Жаңа жүйелерді енгізу келушілерді есепке алудың ашықтығын қамтамасыз етіп, парк кірісін арттыруға және туристер үшін қолайлы жағдай жасауға мүмкіндік береді.
Бүгінгі таңда Іле-Алатау ұлттық паркінде 10 бақылау-өткізу бекеті жұмыс істейді, олардың төртеуі (Алма-Арасан, Бутаковка, Түрген, Қаскелең) биыл жаңартылды. 2026 жылы тағы үш бекетті (Иссык, Кімасар, Қотырбұлақ) автоматтандыру жоспарланып отыр.
Сондай-ақ, жалпы аумағы 500 шаршы метрді құрайтын Бутаковка шатқалында визит-орталықтың құрылысы жалғасуда. Жобаның инвестиция көлемі – 700 миллион теңге. Нысанды пайдалануға беру 2025 жылдың қыркүйегіне жоспарланған. Жоба аясында іргелес инфрақұрылымды дамыту көзделген: жаяу жүргіншілер жолдары, балалар және серуен алаңдары, сондай-ақ глэмпингтер салынады. Бұл Іле-Алатау ұлттық паркінде салынған бесінші визит-орталық болады.
Министр ерекше назарды аумақтың санитарлық жағдайына аударды. 2025 жылдың 7 айында парктен 656 тонна қатты тұрмыстық қалдық шығарылды. «Таза Қазақстан» республикалық акциясы аясында 97,6 мыңнан астам адамның қатысуымен 249 шара өткізілді. Акциялар барысында 8 мыңнан астам ағаш отырғызылып, 828 құс ұялары орнатылды.
Ұлттық парктерді цифрландыру, визит-орталықтар мен аумақтардың жүйелі санитарлық тазалығы туристік инфрақұрылымды дамыту және табиғи мұраны сақтау саласындағы кешенді тәсілдің маңызды элементтері болып табылады.
