Премьер-министрдің орынбасары Ералы Тоғжанов министрліктер жанындағы жауапты хатшылар институтын таратуға қатысты пікір білдірді, - деп хабарлайды Tengrinews.kz тілшісі.
Тоғжановтың айтуынша, жауапты хатшылар институты 15 министрлікте жұмыс істейді. Олардың функцияларын енді аппарат басшылары орындайды.
"Аппарат басшысының қызметі мен функционалдық міндеттері Мемлекеттік қызмет туралы заңда көрсетілген. Ол жауапты тұлғалардың өкілеттіктеріне толық сәйкес келеді. Мәселе күн тәртібінде тұр. Шешім жақын күндері қабылданады. Орташа жалақы жұмыс өтіліне байланысты 685 мыңнан 830 мыңға дейін (теңге)", - деді ол.
Еске салайық, мұның алдында Президент Қасым-Жомарт Тоқаев Қазақстан халқына жолдауына министрліктердегі жауапты хатшыларды сынға алып, оларды таратуды тапсырған болатын. Президент олардың міндеттерін аппарат басшыларына жүктеу керегін айтқан еді.
