Бүгін шымкенттіктер Әз Наурыздың алғашқы мерекесі - Көрісу күнін атап өтуде. Таңертең Астана алаңынан бастау алған мереке қаланың бірқатар көрікті орындарында, Shymqala этноауылында жалғасты. Қыстан көкөрай көктемге аман жеткен жұртшылық Көрісу күнінінің игі дәстүрін жалғап, бір-бірінен саулық сұрасып, төс қағыстырды.
Бұл күні қала әкімі Мұрат Әйтенов шымкенттіктерді Көрісу күнімен құттықтап, Ұлыстың Ұлы күні қарсаңында ұрпақтар сабақтастығын жалғастыру мақсатында қала жастарымен бірге «Белсенді ұзақ өмір орталығындағы» қариялардың амандығын сұрап, батасын алды. Ұлттық киімді насихаттап, домбырасын асынған өнерпаздар ән-жырдан шашу шашып, Көрісу мерекесінің көркін қыздырды. Абыз ақсақалдар мен әжелердің жас буынмен жарқын жүздесуі ұлт болашағы, жастар тәрбиесі, ұлттық құндылықтар турасындағы тағлымды сұқбатқа ұласты.
Күн сайын мұнда 700-ден астам тұрғын 30 шақты қызмет түрін алады. Замана талабына сай жабдықталған орталық бүгінде қариялардың басын қосатын алаңға айналып отыр.
Көрісу – жұртшылықтың қауышу мерекесі ғана емес, жасы үлкендерге ізет көрсетіп, ілтипат білдіретін ізгі амал. Бұл күннің өскелең ұрпақты ізеттілік пен мейірімділікке, татулық пен бауырмалдыққа шақыратын тағылымы мол.
Көрісу — тек адамдардың бір-біріне амандасып, жақсылық тілейтін қауышу мерекесі ғана емес, сондай-ақ жасы үлкендерге ізет көрсетіп, ілтипат білдіретін дәстүрлі көрініс. Өйткені Көрісу салты бір күннің аясымен шектеліп қалмайды, жыл бойы жалғаса береді. Әлдеқандай себептермен 14 наурыз күні болмаған немесе сырт жақта жүрген кез келген адам ауылға жолы түскен бойда қариялардың қолын алып, сәлем беруге тиіс, деп хабарлайды қала әкімінің баспасөз қызметіне сілтеме жасаған no-comment.kz.
ШЫМКЕНТТЕ КӨРІСУ КҮНІНДЕ ҰРПАҚТАР САБАҚТАСТЫҒЫ ҰЛЫҚТАЛДЫ
