Абай ауданы Полиция басқармасының «102» арнасы арқылы Достық шағын ауданының тұрғыны арызданған. Ол онда, ата-енесі мен жолдасының тарапынан қысым көріп, отбасылық жанжалдың жиілеп кеткендігін айтқан.
Мәселенің мән-жайын анықтау үшін көрсетілген мекенжайға Әйелдерді зорлық-зомбылықтан қорғау тобының инспекторы полиция майоры Гүлзира Бектемисова барып, жағдайдың жай-жапсарымен танысты.
Нәтижесінде, жолдасының үстінен қорғау нұсқамасы толтырылып, 30 тәулікке есепке алынды.
Қазіргі таңда полиция қызметкерлері тұрмыстық зорлық-зомбылыққа тап болған азаматшаға құқықтық және психологиялық қолдау көрсету мақсатында баласымен бірге уақытша пана ретінде «Самғау сенім» орталығына орналастырды. «Самғау сенім» орталығы тұрмыстық зорлық-зомбылыққа ұшыраған көпбалалы аналарға, аз қамтамасыз етілген отбасыларға әлеуметтік көмек көрсетеді.
Осы тұста тәртіп сақшылары жайсыз отбасылар мен түрлі отбасындағы зорлық-зомбылық салдарынан жанұя мүшелерінің зардап шегетінін айтып, оларға қатысты күш көрсету, кемсіту, ұрып-соғу жайттары бойынша заң жүзінде жауапкершілік қарастырылғанын ескертеді.
Әйелдер мен қыздарға қатысты зорлық-зомбылық – қазіргі таңдағы ең жойқын адам құқығы бұзылуының бірі. Зорлыққа жол бермеуіміз керек. Бұл денсаулық пен өмірге қауіпті мәселе гендерлік теңсіздік, билікті теріс мақсатта пайдалану және жағымсыз нормалардан бастау алады. Зорлық-зомбылық әйелдердің қоғамдық өмірге араласуына кедергі келтіреді. Гендерлік зорлық-зомбылық отбасылар мен қоғамдастық арасындағы байланысты әлсіретіп, елдердің әлеуметтік тұрақтылық пен экономикалық дамуға қол жеткізуіне жол бермейді.
Тұрмыстық зорлық-зомбылық – бүгінгі таңда кей нәзік жандылардың басты проблемасының бірі. Көбінесе адамдар бұл туралы ашық айта бермейді. Осындай түрлі тұрмыстық зорлық-зомбылық салдарынан зардап шегіп, қайда барарын білмей басы дел-сал болған нәзік жандылар қауымының бүгінгі таңдағы бас сауғалайтын аялы мекені – «Ана үйі. Сондықтан да отбасындағы тұрмыстық зорлық-зомбылықты жою жолында құқықтық және практикалық шараларды іске асырып, оның себептерін кешенді түрде анықтап, тоқтату – басты мақсат.
ПОЛИЦИЯ ҚЫЗМЕТКЕРЛЕРІ ЖОЛДАСЫНАН ЗӘБІР КӨРГЕН БАЛАЛЫ АНАНЫ «САМҒАУ СЕНІМ» ОРТАЛЫҒЫНА ОРНАЛАСТЫРДЫ
