Мемлекет басшысының Жарлығына сәйкес Келес ауданының әкімі Жәнібек Ағыбаевтың өңір тұрғындарымен ІІІ тоқсандағы кездесуі Бірлік ауылдық округінде жалғасын тапты. Бірлік ауылдық мәдениет үйінде өткен кездесу еркін форматта өтіп, тұрғындар сауалына жауап берілді. Алдымен өткен кездесуде көтерілген мәселелердің шешілу бағытында атқарылып жатқан жұмыстарға тоқталған аудан әкімі алдағы жұмыстардың жоспарымен де бөлісті.
- Бүгін, Бірлік ауылдық округіне өздеріңізбен жүздесіп, маңызды мәселелерді бірге талқылау үшін арнайы келіп отырмыз. Сіздерге осы есепті кездесуге өз уақыттарыңызды бөліп келгендеріңізге алғыс айтамын. Өткен кездесулерде маңызды 5 мәселе көтерілген. Сол мәселелерді шешу бойынша арнайы іс-шара жоспары жасалып, жүйелі жұмыстар жүргізілуде, - деді аудан әкімі.
Аудан басшысының Бірлік ауылдық округінің тұрғындарымен өткен кездесулерінде Бірлік ауылдық округіндегі Бірлік, Жаңатіршілік, Үшағаш және Қосөткел елді мекендеріне табиғи газ тарту мәселесі қозғалған еді. Нәтижесінде қазіргі таңда ішкі жүйелерінің және жеткізуші газ құбырларының (магистраль) құжаттары әзірленіп, мемлекеттік сараптаманың оң қорытындысы алынды. Құрылыс жұмыстарын жүргізуге республикалық бюджеттен қаржы бөлдіруге ұсыныс енгізілді. Сонымен қатар, Үшағаш елді мекеніне 150 орындық мектеп құрылысы үшін жобалық-сметалық құжаттары әзірленіп, облыстық құрылыс басқармасы тарапынан мемлекеттік сараптамадан қайта түзету (корректировка) жұмыстары жүргізілуде.
Ал, Бірлік, Жаңатіршілік елді мекендерінде таза ауыз су тартатын насосты қуаттылығы жоғары насосқа ауыстыру мақсатында алдағы сессияда қаржы қаралатын болады. Қосөткел елді мекенінің электр желісіне сәулет-жоспарлау тапсырмасын дайындау үшін тиісті мекемелерден келісім алынып, жер таңдау актісі жасалған. Алдағы уақытта жобалық-сметалық құжаттары әзірленетін болады. Сонымен қатар аталған елді мекенде медициналық пункт салу жоспарлануда.
Айта кетеін, Қазақстан Республикасы Президентінің 2019 жылғы 2 қыркүйектегі Қазақстан халқына Жолдауында Мемлекет басшысы «Азаматтардың барлық сындарлы сауалдарына жедел әрі тиімді жауап беретін «Халық үніне құлақ асатын мемлекет» тұжырымдамасын іске асыру» міндетін қойды. Содан бері билік пен қоғам арасындағы байланыс механизмдері жетілдірілді.
«Халық үніне құлақ асатын мемлекет» қағидасын ұстану аса маңызды. Біз қоғамға іріткі салуды емес, елді ізгі мақсатқа жұмылдыруды ойлауымыз керек. Әділетті Қазақстан идеясының түпкі мәні – осы.
Мемлекет басшысының бастамалары Қазақстанның болашағын айқындайтындығын нақты жеткізе келе, алдағы жолдың қиындығына қарамай ауқымды саяси өзгерістерді ашықтық, әділдік және өзара сенім арқылы жүзеге асыруымыздың маңызылығына тоқталды.
Елімізде «Халық үніне құлақ асатын мемлекет» тұжырымдамасын іске асыру мақсатында түрлі мемлекеттік бағдарламалар іске асырылуда. Халықтың әлеуметтік жағдайын арттыруға бағытталған мұндай бағдарламаларды біреу білсе, біреу білмей жатады. Сол себепті мұндай бағдарламалардың жұрт игілігін көруі үшін осы жобаларды насихаттап, түсіндіру де маңызды болып отыр.
«Халық үніне құлақ асатын мемлекет» тәсілі қоғамда әртүрлі көзқарастар болатынын мойындайды. Әлеуметтік-экономикалық мәртебесіне, этникалық тегіне, жынысына немесе басқа факторларға қарамастан барлық дауыстардың ескерілуін қамтамасыз ету үшін қадамдар жасайды.
Мемлекет басшысының «Халық үніне құлақ асатын мемлекет» тұжырымдамасын орындаудың негізгі тетіктерінің бірі, ол – мемлекеттік органдар тарапынан жеке және заңды тұлғалардың өтініштеріне уақытылы және сапалы жауап беру.
Азаматтарға қолайлы болу үшін интернет-ресурста «Халықпен жұмыс» бөлімі ашылған, онда нормативтік-құқықтық актілер, жеке және заңды тұлғалардың өтініштері туралы және өтінішті қалай жолдау керектігі туралы ақпараттар орналастырылған.
Тұжырымдаманы іске асыруда «Ашық үкімет» жобасын атап айтуға болады. Оның мақсаты – ашық және халық алдында есеп беруге міндетті мемлекетті құру, азаматтардың мемлекеттік басқару саласындағы құқықтары мен мүмкіндіктерін кеңейту, жемқорлыққа қарсы күресті күшейту. Мәселен, «Ашық диалог» порталы мемлекеттік органдар мен қоғам арасындағы тиімді кері байланысты орнатуға арналған.
КЕЛЕС: БІРЛІКТЕГІ ТӨРТ АУЫЛҒА ТАБИҒИ ГАЗ ТАРТЫЛАДЫ
