25-26 сәуір аралығында Auezov University-інде «Кәсіптік оқыту» дайындық бағыты бойынша ХVІ Республикалық студенттік пәндік олимпиада өтті, деп хабарлайды no-comment.kz ақпарат агенттігі.
Бәсекелестік бәйгесіне ілесуде ұлттың зияткерлік әлеуеті маңызды рөл атқарады десек, елдің білім беру саласының сапасын арттыруда пәндік олимпиадалардың орны ерекше. Пәндік олимпиада - алғашқы ғылыми ізденістерге жол ашатын, ғылымның әр түрлі саласында дарындылықты айқындауға мүмкіндік беретін ауқымды сайыс түрі.
Университет базасында өткізілген пәндік олимпиадаға еліміздің беделді 7 жоғары оқу орны 7 команда қатысты. ХVІ Республикалық студенттік пәндік олимпиаданың нәтижесінде шығармашылық түрлеріне қарай келесідей жүлделі орындар тағайындалды:
1-орын: М.Әуезов атындағы Оңтүстік Қазақстан университетінің «Өркен» командасы;
2-орын: Қазақ ұлттық қыздар педагогикалық университетінің «Тұмар» командасы;
2-орын: Ө.Жәнібеков атындағы Оңтүстік Қазақстан педагогикалық университетінің «Көркем» командасы;
3-орын: Жұмабек Ахметұлы Тәшенев атындағы университеттің «Томирис» командасы;
3-орын: А.Мырзахметов атындағы Көкшетау университетінің «Каум» командасы;
3-орын: Қорқыт Ата атындағы Қызылорда университетінің «Алтын оймақ» командасы және Шерхан Мұртаза атындағы Халықаралық Тараз инновациялық институтның «Лашын» командасы.
ХVІ Республикалық студенттік пәндік олимпиада барысында «Кәсіптік оқыту» дайындық бағытында білім алушы студенттер өз білімдері мен дағдыларын, шығармашылықтарын көрсетіп, теориялық және практикалық тапсырмалар бойынша білімін сынады, тәжірибе алмасты. Жеңімпаздарды марапаттау салтанатында кафедра меңгерушісі, педагогика ғылымдарының докторы, профессор Жолдасбекова Сәуле Әбдіразаққызы олимпиадада шын мықтылар анықталғанын атап өтті.
