Бүгін Өзбекәлі Жәнібеков атындағы Оңтүстік Қазақстан педагогиқалық университетінде AICTC-2024 конференциясы басталды, деп хабарлайды no-comment.kz ақпарат агенттігі. Жаңа технологиядағы жетістіктер мен зерттеулерді саралайтын бұл жиын Қазақстанда алғаш рет және Өзбекәлі Жәнібеков атындағы Оңтүстік Қазақстан педагогиқалық университетінде өтіп жатқанын айта кету керек. Бұған дейінгі конференциялар Британияда, Мысырда, Малазияда, Дубайда ұйымдастырылған.
«Ақпараттық коммуникациялық технологиялар және компьютерлер саласындағы жетістіктерге арналған 5-ші халықаралық конференция» атты бұл жиынға әлемнің әр қиырынан 300-ден аса зерттеулер жинақталды. Оның ішінде іріктеліп алынған ең үздік 80 зерттеудің нәтижесі бүгін көпшілікке бөлісілді. Алқалы жиында білім мен ғылымға құштар кез-келген ізденуші білім беруде жаңа технологияны қолданудың өзекті мәселелері мен соңғы жаңалықтарына қанығуда.
Іріктелген мақалалар Қазақстан, Жапония, Қытай, Мысыр, Малазия, Косово, Бразилия, Сингапур, Чехия, Эфиопия, Британия, Ирак, Индонезия, Бангладеш, Польша, Үндістан, Гана, Америка Құрама Штаттан келіп түскенін ескерсек, бұл конференция түрлі географиялық аймақтардың тәжірибесі мен зерттеулерін бір арнаға тоғыстырды.
Бұл жиын ғалымдардың өздері ізденіп жүрген зерттеулерін бөлісетін емес, өзара жақын нетворк орнап, ары қарай да өнімді коллаборацияларға жол ашады деген үміттеміз.
Конференцияға әлемде өзекті қолданбалы зерттеулерімен ойып орын алған жоғары оқу орыннан, сондай-ақ ғылымда артық таныстыруды қажет етпейтін Спринджер халықаралық ғылыми басылымдар ұйымының жауапты ғалымдары қатысуда.
Бұл іс-шара академиялық алмасу және ақпараттық технологиялар мен информатиканы дамытуға жәрдемдесу үшін бірегей мүмкіндік болып табылады, бұл ғылыми қоғамдастықтың дамуына және жалпы қоғамдық прогреске ықпал етеді. AICTC-2024 конференциясының нәтижелері Қазақстанда және одан тыс жерлерде білім беру мен инновацияларды жақсартуға елеулі үлес қосады, сондай-ақ әртүрлі елдердің ғалымдары арасында ұзақ мерзімді және жемісті ғылыми байланыстар орнатуға ықпал етеді деп үміттенеміз.
