Волонтерлік – мемлекет пен қоғам ілгерілеуінің жарқын көрінісі

Шымкент қаласының әкімінің орынбасары Сәрсен Құранбек бұған дейінгі кездесулерде жастармен жиі жиі кездесіп отыруға және түйіткілді мәселелерді тыңдап, сол бойынша бірлесіп жұмыс жасауға уәде берген болатын, деп хабарлайды no-comment.kz ақпарат агенттігі.
Осы орайда, бүгін Шымкент қаласы әкімінің орынбасары Сәрсен Құранбек «Қазақстан-Түркия достығы» саябағында қаладағы волонтерлік ұйымдардың жетекшілері және ерікті жастармен еркін форматта кездесті.
Кездесуге Волонтерлік ұйымдардың көшбасшылары, ЖОО және техникалық және кәсіптік, орта білімнен кейінгі білім беру мекемелерінің жастар ісі жөніндегі комитет төрағалары, ерікті жастар қатысты.
Еркін форматтағы кездесуде қала әкімінің орынбасары Шымкент қаласының волонтерларын айрықша айқындайтын, бірыңғай үлгідегі форма, су тасқынынан зардап шеккен аймақтарға көмек көрсету жұмыстарының әлі жалғасып жатқаны мен жастар арасындағы құмарпаздық, вандализм және ысырапшылдық сияқты әлеуметтік кеселдермен күресу, қоғамға пайдалы жұмыстар жасауға тарту, қоғамға жат, оғаш қылықтардан бойларын аулақ ұстауға үйрету бағыттарында ерекше жұмыстар жүргізу қажет екеніне тоқталды.
Кездесуге қатысушылар волонтерлік қозғалысты дамытудағы бірқатар мәселелерді жеткізіп, ұсыныстарын ортаға салды.
Айта кетейік, бүгінде қаламыздың шырайын ашып, экологиялық мәдениетті қалыптастыруға және ортаны құрметтеуге тәрбиелеу бағыты бойынша қызмет жасап жүрген 12 ұйым мен 3 000-ға жуық волонтер бар.
Кездесу барысында Шымкент қаласы әкімінің орынбасары Сәрсен Құранбек жастардың қоғамдық өмірге қатысуының маңыздылығын және қалада еріктілер қозғалысын одан әрі дамыту қажеттігін атап өтті. Ол еріктілер әлеуметтік мәселелерді шешуде және қаланың оң имиджін қалыптастыруда шешуші рөл атқаратынын атап өтті.
Кездесуде жастарды экологиялық тәрбиелеу мәселелеріне ерекше назар аударылды. Қатысушылар қалалық аумақтарды көгалдандыру және жинау бойынша тұрақты акцияларды, сондай-ақ экологиялық мәдениет бойынша білім беру іс-шараларын өткізу мүмкіндіктерін талқылады.
Кездесу соңында Сәрсен Құранбек барлық қатысушыларға алғысын білдіріп, қала әкімшілігі қаладағы өмірді жақсартуға бағытталған кез келген бастамаларды қолдауға дайын екенін атап өтті. Ол мұндай кездесулер жастарды тыңдау және туындаған мәселелерді бірлесіп шешу үшін үнемі өткізіліп тұратынына сендірді.