Бүгін ғылыми қауымға белгілі тарихшы, «Мұхтартану» ғылыми-зерттеу орталығының жетекші ғылыми қызметкері Ордалы Қоңыратбаевтың «Протоколы Финансового Комитета при Совете Народных Комиссаров Туркестанской Республики (1923 г.)» атты құжаттар мен материалдар жинағы таныстырылды. Танымдық шара көрнекті мемлекет қайраткері Тұрар Рысқұловтың 130 жылдық мерейтойы аясында өткізіліп отыр, деп хабарлайды No-comment.kz ақпарат агенттігі.
Ғылыми басқосуға М. Әуезов атындағы ОҚУ Ғылыми зерттеулер департаментінің директоры Абшенов Хасен Асанбекұлы, Әлеуметтік-гуманитарлық ғылыми зерттеулер институтының директоры Боранбаев Сандыбай Режепұлы, «Мұхтартану» ғылыми-зерттеу орталығының аға ғылыми қызметкері Қалшабек Ақжол Батырұлы, Қазақстан тарихы кафедрасының меңгерушісі Жүнісбаев Серік Мүтанұлы, тарих ғылымының кандидаты Тілеуқұлов Ғаухарбек, «Түркология» ғылыми-зерттеу орталығының басшысы Мыңбаев Нұрлан және басқа да профессорлар мен оқытушылар, филология факультетінің студенттері қатысты.
- Ғалымдар Ордалы Молдалыұлының еңбегін жан-жақты талқылап, өзекті де, құнды мәліметтердің маңыздылығына тоқталды. «Ордалы Молдалыұлының ғылымға сіңірген еңбегі зор. Ағамыз қызмет атқаратын «Мұхтартану» ғылыми-зерттеу орталығы университеміздегі алдыңғы қатарлы жетістіктерімен ерекшеленеді. Бүгін тұсауы кесіліп жатқан құжаттар жинағына құтты болсын айтамын» – деп атап өтті Ғылыми зерттеулер департаментінің директоры Хасен Асанбекұлы.
- «Бұл кітапқа Өзбекстан Республикасының Ұлттық Архивінде сақталған құжаттар мен материалдар енгізілген. Бұл қаржы комитетін 1923 жылы Тұрар Рысқұлов өзі ұйымдастырып, басқарды. Қаржы комитеті Түркістан Республикасының тарихында зор рөл атқарды», – деп атап көрсетті жинақ авторы Ордалы Қоңыратбаев.
Алқалы басқосуда жинақ авторы ғалымдар мен студенттерге қолтаңбасымен кітапты сыйға тартты. Ғалымның көпжылғы зерттеу еңбегі оқырман қолында тозып, елдің ыстық ықыласына бөлене бергей.
Ұлтының бағына туып, Ел үшін күрескен Тұрар Рысқұловтың ерен ісі болашақ ұрпаққа мәңгі үлгі болып қалмақ.
