24 ақпан күні жетінші сайланған Отырар аудандық мәслихатының кезектен тыс үшінші сессиясы депутат С.Кішібайдың төрағалығымен өткізілді. Бұл туралы Отырар ауданы әкімінің баспасөз қызметі мәлім етті.
Бұл күнгі депутаттар форумының күн тәртібіне бірінші мәселе ретінде Отырар ауданының 2021 - 2025 жылдарға арналған даму бағдарламасының бекіту туралы мәселе ұсынылса, бұл жөнінде депутаттар алдында аудан әкімі Әбдіғали Жүнісов жан-жақты әңгіме өрбітіп, ауданымызда алдағы жылдары атқарылатын жұмыстарға кеңінен тоқталды. Аудан басшысының баяндаған ауқымды тірліктердің ойдағыдай жүзеге асырыла беруіне ниеттестіктерін білдірген депутаттар бұл мәселені қолдайтындықтарын қолдарын көтеру арқылы білдірісті.
Сессияның қарауына ұсынылған екінші мәселе - мемлекеттік - жекешелік әріптестік жобасы бойынша мемлекеттік міндеттемелерді қабылдау туралы болды. Бұл мәселені де депутаттар түсіністікпен қабылдап, өздерінің қолдайтындықтарын аңғартты.
Депутаттар форумы күн тәртібіндегі қаралған екі мәселеге байланысты да арнайы шешімдер қабылдады.
«No-comment.kz»- ақпарат
