Бүгін Шымкент қаласының әкімі Ғабит Сыздықбековтің төрағалығымен өткен аппараттық мәжілісте базарларды жаңғырту, энергиямен үздіксіз жабдықтау шаралары сондай-ақ бюджет және жеке инвесторлар есебінен салынып жатқан тұрғын үйлердің құрылысы талқыланды. Кәсіпкерлік және индустриалды инновациялық даму басқармасының басшысы Б.Әзімбердиев қала аумағындағы модернизациядан өтетін базарлар бойынша өзекті мәселелерге тоқталды. Қала басшысы құрылыс заттары сатылатын базарларды сыртқа көшіру жұмыстарын күшейтуде де нақты тапсырмалар беріп, түсіндірме жұмыстарын жандандыруды ескертті, деп хабарлайды No-comment.kz ақпарат агенттігі.
Құрылыс басқармасының басшысы О.Тәжібаев биыл 207,6 мың шаршы метр құрайтын 2670 пәтерлі 66 тұрғын үйді (кредиттік-62, арендалық-4) пайдалануға тапсыру жоспарланғанын жеткізді. Бұл ретте қала әкімі ең бастысы, нысандардың сапасын қадағалап, баспаналардың жайлылығына назар аударуды ескертті. Пәтер кезегінің ашықтығын қамтамасыз ету үшін тиісті басқарма басшыларына баспанаға мұқтаж тұрғындардың мәліметін газет бетінде жариялауды ұйымдастыру тапсырылды.
Энергетика және инфрақұрылымды дамыту басқармасының басшысы Р. Мендіқұлов энергиямен үздіксіз қамтамасыз етуде қабылданып жатқан шараларды баяндады. Басқарма басшысына абонеттерді жарықпен үздіксіз қамтуда тиісті мекемелермен тығыз жұмыс жүргізу тапсырылды.
Ғабит Сыздықбеков аудан, сала басшыларына көпқабатты үйлер ауласында тұрмыстық қалдықтарды жинастыруды жүйелі атқарып, жасыл желектерді суаруды кестеге сай жүргізу, құрылыс мәдениетін сақтауда мердігерлермен жұмыс істеу тапсырылды.
Әкім тұрғындардың қала өміріне белсенді қатысуының маңыздылығын атап өтіп, оларды неғұрлым бастамашыл болуға, қалалық кеңістікті жақсарту жөнінде өз ұсыныстары мен ескертулерін айтуға шақырды. Соңында, Ғабит Сыздықбеков әкімшілік пен тұрғындардың бірлескен күш-жігерімен Шымкент еліміздің басқа қалаларына үлгі бола отырып, өз дамуында жаңа биіктерге жете алатынына сенім білдірді.
