«Мен барлық солтүстік қазақстандықтарды батыр деп санаймын. Қиын сәтте бүкіл ел көмегін аяған жоқ. Төтенше жағдайдың алғашқы күндерінен бастап әскерилер, құтқарушылар, полицейлер мен қарапайым тұрғындар су тасқынымен күресті. Траншеяларды қазып, инертті материалмен қаптар дайындап, бөгеттерді нығайтты, аулаларды тазартты, зардап шеккендерге қолдау көрсетті. Біздің облысқа келу барысында Мемлекет басшысы зілзалаға қарсы күреске қатысқан барлық азаматқа алғысын білдірді», – деді әкім.
Кейінгі басты міндет зардап шеккен үйлерді қалпына келтіру болды.
«Ел үкіметі барлық қажетті көмек пен қолдауды көрсетті. Ақшалай өтемақы толық көлемде төленді. Барлығы біз уәде еткендей баспана алды. Президенттің шақыруына жауап беріп, тұрғын үй сатып алуға және салуға қаражат бөлген меценаттарға солтүстік қазақстандықтар үшін ерекше алғыс айтамыз», –деп атап өтті Ғауез Нұрмұхамбетов.
Петропавлда жаңа «Бірлік» шағын ауданы пайда болды. Онда қазірдің өзінде 700 отбасы тұрады. Балабақша ашылып, мектеп құрылысы жоспарланған. Сонымен қатар зардап шеккендерге 1394 пәтер сатып алынды. Барлық ауданда механикаландырылған бригадалар ұйымдастырылды. Олар жазғы кезеңде 241 үйді қалпына келтіріп, 2 мыңнан астам үйді бұзды. Сондай-ақ иелері 1 658 үйді өз бетінше жөндеді. Әрбір зардап шеккен тұрғынға жөндеуге өтемақы төленді.
«Су тасқынының алғашқы күнінде Петропавл сумен жабдықтаусыз қалғанын бәріңіз білесіздер. Содан кейін бірінші көтергіш сорғы станциясы қатты соққыға жығылды, электрмен қамтамасыз ететін 4 электр фидері мұзбен кесілді. Станцияның өзі толығымен су астында қалды. Су тасқыны кезінде стандартты емес шешімдер қабылданды. Біз шұғыл түрде Пестрое көліне қалқымалы сорғы станциясын қойдық. Бір түнде біз құбырларды жеткізуді ұйымдастырдық және оларды бүкіл жағажай арқылы тарттық, понтонға қалқымалы станция орнаттық. Ал бір күннен кейін біз облыс орталығына су бердік», – деді өңір басшысы.
Қазір Үкіметтің қолдауымен Қалалық су арнасының бірінші көтергіш сорғы станциясын қайта құру жобасы іске асырылуда. Жаңа жабдықтар жеткізіледі, құрылыс-монтаж жұмыстары жүргізіледі. Тұрақты электрмен жабдықтау үшін жерасты кабелі де тартылды. Станцияның айналасындағы бөгет нығайтылды.
Петропавл мен Қызылжар ауданында 8 қорғаныс бөгеті нығайтылып, салынды. Нәтижесінде бөгеттердің биіктігі 7 метрге дейін көтерілді. Осы мақсатта 158 бірлік техника жұмылдырылып, 1,5 млн тонна инертті материалдар әкелінді. Облыс бойынша ұзындығы 130 шақырым 60 қорғаныс біліктері мен бөгеттері бар.
