«Былтырғы су тасқыны ел үшін үлкен сын болды. Біз оның салдарын жоюға атсалыстық. Қор есебінен 5 облыста 627 үй салынды. Біз әуелден нәтижелі жұмыс жүргіземіз деп шештік. Үй салу – бұл нәтиже. Тіпті, Атырау облысының тұрғындары шағын аудандардың біріне «Қазақстан халқына» деген атау берді», – деді спикер.
Сонымен қатар, Қор қызметінде ауылдық жерлерді қолдауға басымдық береді. «Қазақстан халқына» қоғамдық қоры серіктестермен бірге Батыс Қазақстан облысы әкімдігінің қолдауымен өңірдің 25 ауылдық кітапханасын коммуналдық орталықтарға айналдырды. Пилоттық жоба аясында ересектер мен балаларға арналған үйірмелер ашылды. Кітап қоры да жаңартылды.
Шалғайдағы елді мекендерде Қордың қолдауымен ауыл жастары үшін 100 спорт залы ашылды. Ауылдық жерлерде, моно және шағын қалаларда ангар үлгісінде тағы 40 спорт залын салу жоспарда бар. 4 нысан пайдалануға берілді. Спорт және мәдениет саласында Қор барлығы 14 бағдарлама мен жобаны іске асырады.
