Оның айтуынша, тұжырымдама жобасындағы 13 бағыт бойынша жұмыс басталды. Құжатта теңдік және кемсітпеу, құқықтық қорғалу, әлеуметтік деңгейді арттыру, инклюзивті еңбек нарығы, денсаулық абилитация және оңалту; инклюзивті білім беру, қоғамдық-саяси өмірге тарту, кедергісіз орта және қызметтердің қолжетімділігі, төтенше жағдайлар мен климаттық қауіп-қатерлер жағдайындағы қауіпсіздік, жеке отбасылық өмір, мәдени өмір, бос уақыт және спорт, ағарту-тәрбие жұмысы, мониторинг және есепке алу сынды тетіктер қамтылған.
«Инклюзивті саясат тұжырымдамасының іс-қимыл жоспарында барлығы 52 іс-шара іске асырылады. Салалық министрліктер мен жергілікті атқарушы органдар аталған іс-шаралардың орындаушылары болады. Әрбір іс-шара бойынша мерзімдер мен аяқталу нысандары белгіленді», – деді спикер.
ҚР Еңбек және халықты әлеуметтік қорғау министрлігі мүдделі мемлекеттік органдармен бірлесіп, жаңа әлеуметтік-құқық қорғау моделіне сәйкес «Қазақстан Республикасының кейбір заңдарына мүгедектігі бар адамдардың құқықтарын қорғау мәселелері бойынша өзгерістер мен толықтырулар енгізу туралы» заң жобасын әзірлейді. Заң жобасы Біріккен Ұлттар ұйымының Мүгедектердің құқықтары туралы конвенциясының ережелеріне сәйкес мүгедектігі бар адамдарға қатысты теңдік пен кемсітушілікті жоюға бағытталмақ.
