Былтыр Мемлекет басшысы экономиканы цифрландыруды жалғастыру және жасанды интеллект технологияларын кеңінен қолдануды қамтамасыз ету өте маңызды екенін айтты. Осыған байланысты, Ғылым және жоғары білім министрлігі Цифрлық даму министрлігі және Назарбаев Университетімен бірлесіп KazLLM үлкен тілдік моделін әзірледі. Ол - цифрлық ортада қазақ тілін қолдауға арналған осындай деңгейдегі алғашқы жасанды интеллект құралы. Министрлік пен ведомстволық бағынысты ұйымдар KazLLM үлкен тілдік моделін жасау үшін қазақ тілінде 1 млрд-тан астам сөз қолданысын берді. Бұл туралы ҚР ҒЖБМ Цифрландыру және мемлекеттік қызмет көрсету департаментінің директоры Нұрсұлтан Махатов ОКҚ брифингінде хабарлады, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Оның айтуынша, Ұлттық тіл моделін әзірлеуге және тестілеуге 117 сарапшы, сондай-ақ 40-тан астам ғылым кандидаттары, PhD докторлары және ғылым магистрлері тартылды. KazLLM тілдік моделін оқыту қазақ, ағылшын, орыс және түрік тілдерінде 148 млрд токен негізінде жүргізіледі.
«Сондай-ақ, Министрлік ЖИ кадрларын даярлау бойынша белсенді жұмыс жүргізуде. 2024 жылы «Жасанды интеллект негіздері» пәнінің ұсынылатын мазмұнын, сондай-ақ білім беру процесінде ЖИ пайдаланудың жалпы принциптерін айқындайтын жоғары және жоғары оқу орнынан кейінгі білім беруде ЖИ қолдану бойынша ЖОО-ның аралық стандарты бекітілді. Сондай-ақ Министрлік жоғары білімнің мемлекеттік жалпыға міндетті стандартына ЖИ қолдану бойынша құзыреттерді игеруге бағытталған пәндерді барлық білім беру бағдарламаларына енгізуді көздейтін өзгерістер енгізді. Осыған байланысты 20 ЖОО базасында ЖИ бойынша 20 білім беру бағдарламасы енгізілді, олар бойынша 2196 студент оқиды»,-деді ведомство өкілі.
Ұлттық ЖИ платформасында 5 жобаны жүзеге асыру жоспарда бар. Олар: 2025 жылы ҰБТ өткізудің нормативтік ережелері, статистикалық ақпарат, грантқа түсу кезіндегі сұрақтар бойынша консультативтік AI Talapker чат-бот; ҰБТ тапсыру кезінде академиялық адалдықты арттыруда ЖИ қолдану; ҰБТ үшін тест тапсырмаларын әзірлеу үшін ЖИ енгізу; Ұлттық мемлекеттік ғылыми-техникалық сараптама орталығының ғылым бойынша ЖИ көмекшісі; Грамматиканы, пунктуацияны және стильді тексеруге арналған интеллектуалды құрал QAZGRAMMA - білім беру және кәсіби ортада қазақ тілінде сауатты жазбаша тілді дамытуға көмектеседі.
Сондай-ақ Министрлік жасанды интеллект саласында адами капиталды дамытуға бағытталған AI-Sana инновациялық бағдарламасын бастады. Бастама 100 мың студентті қамтып, оларға экономиканың негізгі салаларына ЖИ енгізу үшін білім мен дағдыларды береді. Ол жас таланттарды қолдауға және DeepTech стартаптарын құруға бағытталған. Әлемнің жетекші сарапшыларының қатысуымен әзірленген бағдарлама, жобаның жетекшісі – Стэнфорд университетінің Кәсіпкерлік бағдарламаларының авторы Пол Ким. Бұл бағдарлама жоғары оқу орындарының білім беруден ғылыми-зерттеу тәсіліне көшуіне ықпал ете отырып, студенттер мен оқытушылардың ойлауын өзгертуге арналған. «AI-Sana» болашақ даму үшін стратегиялық құрал, инновациялар мен кәсіпкерлік үшін трамплин, сондай-ақ студенттік кезден бастап стартап-ұлтты қалыптастыру үшін идеологиялық негіз болады.
Сонымен қатар ведомство трансұлттық компаниялармен ынтымақтастық орнатып, жоғары білікті мамандарды даярлауға көңіл бөліп отыр. Мәселен, Google, NVIDIA, Huawei, EduSystem, Lenovo сынды алып компаниялармен бірқатар маңызды жоба іске асырылмақ.
