Орталық коммуникациялар қызметінің алаңында ҚР СИМ Сауда комитетінің төрағасы Айдар Әбілдабеков базарлар мен сауда объектілерінің иелеріне көрсетілетін мемлекеттік қолдау шаралары туралы айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Баспасөз мәслихатында журналист еліміздегі нарықтарды жаңғырту меншік иелері есебінен жүргізіліп жатқаны туралы сұрақ қойды. Журналистің айтуынша, осыған байланысты жалға алу бағасы көтерілуі мүмкін. Журналист мұның ақыр соңында шағын және орта бизнеске, сондай-ақ тұтынушыларға қалай әсер ететінін түсіндірді. Сауда комитетінің басшысы Айдар Әбілдабеков кез келген жаңғырту белгілі бір қаржылық шығындарды талап ететінін атап өтті.
«Біз өз тарапымыздан субсидиялау түріндегі мемлекеттік қолдау шараларын, бірінші кезекте банктің пайыздық мөлшерлемесін қарастырдық. Егер кәсіпкер кредитті 20% немесе 22% - бен ресімдесе, оның 10,75%-н мемлекет субсидиялайды. Яғни, мемлекет тарапынан мұндай көмек көзделген. Сонымен қатар сол базарлар мен басқа да сауда объектілері үшін несиеге кепілдік беріледі. Егер оларға қарыз жетіспесе, ол мемлекеттен көмек ала алады. Инвестор не базар иесі өзінің жеке қаражатын немесе қарызға алған қаражатын жұмсайтынын ескере отырып, ол жалдау ақысының құнын көтере ме, жоқ па, соны өзі шешуге құқылы. Мұның бәрі сатушылар тарапынан пайда болатын сұранысқа, орналасқан жеріне байланысты болады», - деп түсіндірді спикер.
Сондай-ақ Айдар Әбілдабеков базарларда сатушылар қандай салық режимінде жұмыс істейтінін нақтылады.
«Бізде бәріне бір Салық кодексі бар. Олар қолданыстағы Салық кодексінің нормаларына сәйкес жұмыс істейді. Әрбір саудагер өзінің салық режимін таңдауға құқылы. Яғни, ол жеңілдетілген, жақында енгізілген бөлшек салық бойынша жұмыс істей алады, сонымен қатар ҚҚС төлеуші бола алады және жалпы белгіленген тәртіппен жұмыс істей алады», - деп қосты ол.
