Бүгінгі таңда инвесторлардың құқықтарын қорғау Кәсіпкерлік кодексімен реттеледі, инвесторлардың құқықтарын қорғауға жауапты бірнеше институт пен тетіктер жұмыс істейді. Инвестициялық омбудсмен қызметі шеңберінде Сыртқы істер министрлігімен Kazakh Invest инвесторлардың мемлекеттік органдардың әрекеттері мен әрекетсіздігіне қатысты барлық өтінішін, шағымдарын қабылдайды, дауларды сотқа дейінгі және соттан тыс тәртіппен тиімді шешу үшін бар күшін салады. Жалпы, ұлттық компания инвесторлардың құқықтарын қорғау саласында қалай жұмыс істейтіні туралы «KAZAKH INVEST» Ұлттық компаниясы» АҚ Басқарма төрағасы орынбасарының м.а. Азамат Қожанов ОКҚ алаңында өткен дөңгелек үстел барысында айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Азамат Қожанов атап өткендей, инвестициялық омбудсмен 2014 жылдан бастап жұмыс істейді. Инвестициялық омбудсмен ҚР Премьер-Министрі болып табылады. Үкімет басшылығы деңгейінде инвестициялық жобалардың негізгі мәселелерін шешумен Премьер-Министрдің бірінші орынбасары төрағалық ететін инвестициялық штаб айналысады. 2021 жылдан 2023 жылға дейінгі кезеңде инвестициялық штабтың 20 отырысы өткізіліп, 120-дан астам мәселе қаралды.
Спикердің мәліметінше, Мемлекет басшысының қайта форматтау туралы Жарлығынан кейін инвестициялық штабтың жаңа форматтағы 35 отырысы өткізіліп, 50 млрд доллардан астам сомаға 117 инвестициялық жоба қаралды. 700 - ден астам тапсырма берілді - жобалар бойынша 613, жүйелік сипаттағы 164 тапсырма. Құқықтармен заңды мүдделерді қорғау міндеті шеңберінде Бас прокуратурамен ынтымақтастық өте маңызды рөл атқарады.
Бүгінгі таңда Kazakh Invest Бас прокуратурамен бірлесіп Орталық және өңірлік деңгейде тығыз өзара іс-қимыл мен ынтымақтастық орнатты. Спикердің айтуынша, құрылған фронт-офистерде, инвесторлардан келіп түскен өтініштер жедел қаралады және шешіледі. Инвесторлардың құқықтарына нұқсан келтіру фактілеріне прокурорлық ден қою олардың қорғалу деңгейін арттыруға ықпал етеді. 2023 жылдың қазан айынан бастап инвестициялық жобаларды уақытылы үйлестіру және сүйемелдеу жұмыстарын жүргізуге Бас прокуратураның екі қызметкері тікелей Kazakh Invest кеңсесіне орналастырылады.
«Бүгінгі таңда прокуратура қызметкерлеріне қажетсіз бюрократиялық рәсімдерсіз тікелей жүгінуге және осы немесе өзге мәселені шешуде қажетті қолдау алуға болатын барлық жағдай жасалған. Инвесторларға жобаларды іске асырудың барлық кезеңінде қажетті құқықтық қолдау көрсетіледі», - деп атап өтті ол.
Азамат Қожанов Бас прокуратураның көмегімен оң шешімін тапқан инвесторлардың кейстерімен бөлісті.
«Негізінен инвесторлардың өтініштері салықтық және кедендік әкімшілендіру, рұқсат беру құжаттарының техникалық шарттарын алу, жер учаскелерін ресімдеу, мемлекеттік органдардың заңсыз әрекеттері немесе әрекетсіздігі және т.б. мәселелерге қатысты. Мысалы, прокурордың шаралары бойынша шетелдік инвестор сүт өнімдерін шығаратын зауытты іске қосқан жер учаскесін заңсыз алып қою рәсімі тоқтатылды. Облыс орталығының бас жоспары өзгертілуіне байланысты әкімдік зауытты қала шегінен тыс жерге көшіруді заңсыз талап етті.Бұл ретте инвестор зауытқа 1,5 млрд теңге салды. Сондай - ақ прокуратураның көмегімен салық органдарына кедендік баждарды, ҚҚС мен өсімпұлдарды негізсіз қосымша есептеуге байланысты неміс инвесторының мәселесі шешілді», - деп түйіндеді спикер.
