Қазақстан мұсылмандары діни басқармасы Түркия, Әзірбайжан, Өзбекстан, Қырғызстан елдерінің ғұламаларымен келісе отырып, биылғы Рамазан айының басталуын 1 наурызға белгіледі. Қасиетті Қадір түні 26-нан 27-наурызға қараған түнге сәйкес келеді, ал 30 наурыз – Ораза айт мерекесі. Осыған орай бүгін Өңірлік коммуникациялар алаңында Шымкент қаласының бас имамы Бақдаулет Нұрматұлы Абдурахмановтың қатысуымен “Рамазан айына дайындық” тақырыбында брифинг өтті, деп хабарлайды No-comment.kz ақпараттық агенттігі.
Жалпы, балиғат жасына толған әрбір мұсылманға Рамазан айында ораза ұстау – міндет. Алайда жолаушылар, науқастар, жүкті немесе емізулі баласы бар аналар оразаны кейінге қалдыруына рұқсат берілген. Ораза – тек ішіп-жеуден тыйылу емес, ол рухтың азығы, тәннің шипасы, сабыр мен нәпсіні тізгіндеудің мектебі.
Қайырымдылық пен мейірім айы Рамазан – тек өзімізді емес, өзгелерді де ойлайтын ай. Сондықтан мұқтаж жандарға қолдау көрсету, қайырымдылық жасау – сауапты істердің қатарында. Бұл орайда Қазақстан мұсылмандары діни басқармасы қасиетті айда түрлі игі бастамаларды жүзеге асырады. Кәсіпкерлерді азық-түлік бағасына жеңілдік жасауға, қоғамдық тамақтану орындарын ауызашар мәзірін қолжетімді етуге шақырады. Сондай-ақ, құдайы астарды ауызашар уақытында өткізу сауапты іс саналады.
Оразаға қатысты жаңашылдықтар
Ақпараттық технология дамыған заманда діни сауатты арттыру мақсатында бірнеше жобалар іске қосылды. Атап айтқанда:
MuftyatBot – діни мәселелер бойынша сұрақтарға жауап беретін Телеграм-бот; ? muftyat.kz сайтында барлық 6 000 елді мекеннің ораза және намаз кестелері жарияланды; ? Діни ақпарат беру орталығы тәулік бойы қызмет етеді (байланыс нөмірі: 8 707 233 30 30);
«Рамазан оразасына қатысты пәтуалар», «Рамазанға қатысты 200 сұрақ» және басқа да діни кітапшалар жарық көрді.
Тілге құрмет – дінге құрмет
Қасиетті айда жастарды діни терминдерді қазақша қолдануға шақырамыз. Бабаларымыз ғасырлар бойы ауызашар, сәресі сөздерін пайдаланған. Сол дәстүрді жалғастырып, ифтар немесе сухур секілді кірме сөздерден арылғанымыз жөн.-деді Бақдаулет Нұрматұлы.
Толығырақ: https://www.youtube.com/live/zNFFj5lFA4c?si=rbzHhhDngZx5V1q-
