ҚР Өнеркәсіп және құрылыс министрлігі кәріз-тазарту құрылыстарын реконструкциялау және салу бойынша белсенді жұмыс жүргізіп жатыр. Ведомствоның мәліметінше, 90 қаланың тек 60-ында ғана орташа тозу деңгейі шамамен 65% болатын кәріз-тазарту құрылыстары бар. Орталық коммуникациялар қызметінің алаңында ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков еліміздің коммуналдық секторын жаңғырту үшін қандай жұмыстар жүргізіліп жатқаны туралы айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Спикер атап өткендей, 21 қалада кәріз-тазарту құрылыстарын қайта жаңарту немесе салу талап етілмейді, 23 қалада кәріз (кәріз-тазарту құрылыстары) жоқ, оның ішінде халық санының аздығына немесе орталық су бұрудың болмауына байланысты 13 КТҚ жобасының құрылысы кейінгі мерзімге ауыстырылды. 7 қалада жалпы сомасы 30 млрд теңгеге КТҚ қайта құру және салу жұмыстары жүргізілуде. Өткен жылы Форт-Шевченко және Сарыағаш қалаларында КТҚ салу және реконструкциялау жұмыстары аяқталды.
«Биыл Қызылорда және Леңгір қалаларында екі КТҚ жобасын жүзеге асыруға 1,7 млрд теңге бөлінді. Қонаев қаласында КТҚ жобасын жаңғырту өңір басшылығының шешімі бойынша МЖӘ тетігі бойынша іске асырылып жатыр. Коммуналдық желілерді жаңарту мәселесін шешу мақсатында өткен жылдың желтоқсан айында «Энергетикалық және коммуналдық секторларды жаңғырту» Ұлттық жобасы қабылданды. 32 кәріз-тазарту жүйесін қайта жаңарту және 13-ін салу жоспарланған, оның ішінде 8 жобаны халықаралық қаржы ұйымдарының қаржысы есебінен іске асыру көзделген», – деді Бақытжан Жүнісбеков.
14 жобаны «Бәйтерек» Ұлттық басқарушы холдингінің облигациялық қарызы есебінен, ал 23 жобаны республикалық бюджеттен қаржыландыру жоспарлануда.
