Қазақстан Республикасы Ауыл шаруашылығы министрлігінде вице-министр Азат Сұлтановтың Эстониядан келген делегациямен кездесуі өтті. Делегация құрамында ірі логистикалық компаниялардың өкілдері, теңіз порттары мен теміржол инфрақұрылымының басшылары болды, деп хабарлайды No-comment.kz - ҚР Ауыл шаруашылығы министрлігіне сілтеме жасап.
Келіссөздердің негізгі тақырыбы – логистикалық ынтымақтастықты дамыту және қазақстандық ауыл шаруашылығы өнімдерін Эстонияның көлік-порт инфрақұрылымы арқылы Еуропа нарығына жеткізуді кеңейту болды.
«Еуропалық бағыт біз үшін стратегиялық маңызға ие, біз ынтымақтастықты тереңдетуге дайынбыз», — деді Азат Сұлтанов.
Эстониялық тарап қазақстандық шаруалармен серіктестікті нығайтуға қызығушылық танытты. Кездесуде Силламяэ мен Мууга теңіз порттары арқылы астық пен майлы дақылдарды экспорттау мүмкіндіктері талқыланды.
«Эстония порттары Қазақстан мен Еуропаны байланыстыратын маңызды көпір бола алады. Бұл тек астықпен шектелмей, майлы дақылдарды да қамтиды. Еуропа қазақстандық астықты және оның жоғары сапасын жақсы біледі», — деді Эстониядағы екінші ірі теңіз порты – Силламяэ портының президенті Тийт Вяхи.
Кездесу қорытындысы бойынша тараптар өзара тиімді ынтымақтастықты дамытуға және елдер арасындағы диалогты тұрақты түрде жалғастыруға келісті.
