Тұрғын үй сертификатына өтінім қабылдау шілде айының 26-нан басталады, деп хабарлайды Шымкент қаласы әкімдігінің баспасөз қызметі.
«Нұрлы жер» мемлекеттік бағдарламасы аясында несиелік бағытта баспаналы болуға ниет білдірген тұлға соңғы 6 айда отбасының жиынтық табысы оның әрбір мүшесіне шаққанда 106336,2 теңгеден аспаған жағдайда және тұрғын үй сатып алуға ипотекалық тұрғын үй қарызын беру туралы банктің мақұлдаған хаты арқылы азаматтар тұрғын үй сертификатына өтінім жібере алады.
Осы жерде айта кететін жәйт, отбасының жиынтық табысы ретінде - отбасы мүшелерінің расталған кіріс табысы есептеледі.
Еске сала кетейік биылғы жылы тұрғын үй сертификатына құжаттарды қабылдау «www.kezekte.kz» интернет ресурсы арқылы онлайн жүзеге асырылады.
Тұрғын үй сертификаты «Нұрлы жер» мемлекеттік бағдарламасы аясында несие негізінде тұрғын үй алуды көздеген, тұрғын үй сертификаттарын алу талаптарына сай келетін әрбір азаматқа 1 миллион теңгеге дейін мөлшерде мемлекет тарапынан бастапқы жарна мөлшерінің бір бөлігін жабуға көмек ретінде беріледі.
