Жамбыл облысына жұмыс сапары барысында Қазақстан Республикасының Төтенше жағдайлар министрі генерал-лейтенант Шыңғыс Әрінов өңірлік Төтенше жағдайлар департаментінің жаңартылған Дағдарыс орталығының жұмысымен танысты. Ведомство басшысына Жоспарлау және жедел басқару орталығының операциялық залы көрсетілді. Ол заманауи жабдықтармен және цифрлық мониторинг жүйелерімен жарақталған, деп хабарлайды No-comment.kz - ҚР Төтенше жағдайлар министрлігіне сілтеме жасап.
Жүргізілген жаңғырту жұмыстары төтенше жағдайларды жою кезінде күштер мен құралдарды үйлестіру тиімділігін айтарлықтай арттырғаны атап өтілді. Жаңартылған инфрақұрылым тұрақты байланысты, жедел ақпарат алмасуды және басқару шешімдерін нақты уақыт режимінде қабылдауды қамтамасыз етеді. Дағдарыс орталығында тәулік бойы кезекшілік ұйымдастырылған, қызметкерлердің үздіксіз жұмыс істеуі мен ықтимал қауіптерге жылдам әрекет етуі үшін барлық қажетті жағдай жасалған.
Осындай дағдарыс орталықтарын құру және жаңғырту ведомство басшысының тапсырмасымен жүзеге асырылып жатыр. Қазіргі таңда еліміздің 20 өңірінде Төтенше жағдайлар департаменттері базасында осындай орталықтар жұмыс істейді. Бұл республика бойынша төтенше жағдайларға әрекет етуге дайындық деңгейін арттырып, басқарудың бірыңғай жүйесін қалыптастыруға мүмкіндік береді.
Сонымен қатар министр жеке құраммен жұмыс кеңесін өткізді. Кездесу барысында өңірдегі азаматтық қорғау жүйесін одан әрі дамыту, материалдық-техникалық базаны нығайту және жедел әрекет ету қызметтерінің жұмысына заманауи технологияларды енгізу мәселелері талқыланды. Кеңес қорытындысы бойынша бөлімшелердің жұмыс тиімділігін арттыруға және Жамбыл облысы тұрғындарының қауіпсіздігін қамтамасыз етуге бағытталған нақты тапсырмалар берілді.
