Шымкент қаласы халықаралық экономикалық ынтымақтастықты кеңейту бағытындағы жұмысын белсенді жалғастырып келеді. Соңғы жылдары мегаполис шетелдік инвесторлармен және халықаралық бизнес қауымдастықтармен байланысты нығайтуға басымдық беріп, жаңа инвестициялық жобаларды тартуға ерекше көңіл бөлуде. Бұл бағыттағы маңызды алаңдардың бірі – халықаралық бизнес-форумдар. Олар өндірістік кооперацияны дамытуға, экспорттық әлеуетті арттыруға және өңірдің инвестициялық мүмкіндіктерін әлемдік бизнеске таныстыруға ықпал етеді.
Осы мақсатта Шымкент қаласында Қазақстан–Үндістан бизнес форумы өтті. Іс-шараға Шымкент қаласы әкімінің орынбасары Арман Сабитұлы, Үндістан Республикасының Қазақстандағы Төтенше және Өкілетті Елшісі Сайлас Тангал бастаған делегация, мемлекеттік органдардың, бизнес қауымдастықтарының, инвесторлар мен кәсіпкерлердің өкілдері қатысты.
Форум барысында Қазақстан мен Үндістан арасындағы сауда-экономикалық және инвестициялық ынтымақтастықты кеңейту мәселелері кеңінен талқыланды. Сонымен қатар өнеркәсіп, өндіріс, кәсіпкерлік және инвестиция салаларында бірлескен жобаларды жүзеге асырудың жаңа мүмкіндіктеріне назар аударылды. Тараптар тікелей іскерлік байланыстарды дамыту екі ел арасындағы экономикалық әріптестікті жаңа деңгейге көтеруге мүмкіндік беретінін атап өтті.
Форумның маңызды бөлігінің бірі – үндістандық делегацияның Шымкент қаласының өндірістік әлеуетімен танысуы болды. Делегация «Оңтүстік» индустриялық аймағында орналасқан «Qazalpack» кәсіпорнын, «Оңтүстік» арнайы экономикалық аймағындағы «Бал Текстиль» өндіріс орнын және «Жұлдыз» индустриялық аймағындағы «Wan Sheng Ceramic» зауытын аралады. Қонақтарға кәсіпорындардың өндірістік мүмкіндіктері, қолданылатын технологиялар және инвестициялық жобалардың жүзеге асырылу барысы таныстырылды.
Мұндай өндіріс орындары Шымкенттің өңдеу өнеркәсібінің қарқынды дамып келе жатқанын және қаланың өндірістік әлеуетінің жылдан-жылға артып отырғанын көрсетеді. Бүгінде мегаполисте тоқыма өнеркәсібі, құрылыс материалдарын өндіру, қаптама өндірісі, химия және фармацевтика салалары белсенді дамып, қазақстандық өнімнің ішкі және сыртқы нарықтағы үлесін арттыруға ықпал етуде.
Сарапшылардың пікірінше, халықаралық бизнес-форумдар жаңа инвестициялар тартумен қатар, технология алмасуға, экспорттық байланыстарды кеңейтуге және бірлескен өндірістер құруға мүмкіндік береді. Мұндай кездесулер шетелдік инвесторлардың өңірдің мүмкіндіктерімен тікелей танысуына жағдай жасап, ұзақ мерзімді әріптестіктің негізін қалыптастырады.
Шымкентте ұйымдастырылған Қазақстан–Үндістан бизнес форумы қаланың халықаралық инвестициялық имиджін нығайтып, жаңа іскерлік байланыстардың орнауына жол ашты. Мұндай іс-шаралар өндіріс пен кәсіпкерлікті дамытуға, өңірдің экспорттық әлеуетін арттыруға және Шымкенттің еліміздегі жетекші индустриялық әрі инвестициялық орталықтардың бірі ретіндегі мәртебесін одан әрі күшейтуге ықпал етеді.
