Жаңа Конституцияның 35-бабы Қазақстан Республикасы азаматтарының тікелей және өз өкілдері арқылы мемлекет ісін басқаруға қатысуға, мемлекеттік органдар мен жергілікті өзін-өзі басқару органдарына жүгінуге, сондай-ақ жеке және ұжымдық өтініш жолдауға құқығын бекітеді.
Бұл норма азамат пен мемлекет арасындағы байланыстың конституциялық негізін айқындайды. Яғни тұрғын өзіне қатысты мәселені мемлекеттік органға жеткізуге, ұсыныс енгізуге және қоғамдық өмірге қатысуға құқылы. Сонымен қатар азаматтардың мемлекеттік қызметке кіруге тең құқығы да осы бапта бекітілген.
Бұл мүмкіндік Түркістан облысы сияқты халқы көп әрі ауылдық елді мекендері басым өңір үшін ерекше маңызды.
Бүгінде облыста 801 елді мекеннің барлығында ауыз су жүйесі бар. Сонымен қатар 2026 жылы Арыс, Сауран, Мақтаарал, Шардара және Қазығұрт аудандарындағы 10 елді мекенде тұратын 45,7 мың тұрғынды тәулік бойы сапалы ауыз сумен қамтамасыз ету мәселесін шешу жоспарланған.
Мұндай әлеуметтік мәселелердің тиімді шешілуінде тұрғындардың өтініші мен ұсынысының маңызы зор. Конституция азаматқа өз мәселесін мемлекеттік органдарға жеткізуге және мемлекет ісіне қатысуға нақты құқық береді. Азаматтың белсенділігі – қоғамның дамуына қосылған үлес.
