Қазақстанда қызметкерлерді өндірістегі жазатайым оқиғалардан сақтандыру қорғанысы күшейтілуде

Қазақстанда қызметкерлерді өндірістегі жазатайым оқиғалардан сақтандыру қорғанысы күшейтілуде

Қазақстан Республикасы Еңбек және халықты әлеуметтік қорғау министрлігі азаматтардың қаржылық қорғалуын қамтамасыз етуге, денсаулығын сақтауға және еңбек қауіпсіздігін арттыруға бағытталған әлеуметтік кепілдіктерді нығайту жұмыстарын жалғастыруда. Бұл бағытта қызметкерлерді еңбек міндеттерін атқару кезінде жазатайым оқиғалардан міндетті сақтандыру (ЖОМС) жүйесі маңызды рөл атқарады. Ол өндірісте зардап шеккен қызметкерлер мен олардың отбасыларына қолдау көрсетіп қана қоймай, жұмыс берушілердің де қаржылық тәуекелдерін азайтуға мүмкіндік береді, деп хабарлайды No-comment.kz - ҚР Еңбек және халықты әлеуметтік қорғау министрлігіне сілтеме жасап.

Қазақстанда 2005 жылдан бері қолданыстағы ЖОМС жүйесі өндірістік жарақат немесе кәсіптік ауру салдарынан адам өмірі мен денсаулығына келтірілген зиянды өтеуді көздейді. Бұл жүйенің маңызы әсіресе жазатайым оқиға салдарынан азаматтың ұзақ уақыт еңбекке жарамсыз болып қалуы, отбасы табысының төмендеуі немесе асыраушысынан айырылуы жағдайында арта түседі. Сонымен қатар сақтандыру қорғанысы ірі өнеркәсіптік кәсіпорындардың қызметкерлеріне ғана емес, шағын және орта бизнес өкілдеріне де қажет. Өйткені өндірістегі ауыр жазатайым оқиғалар кез келген салада болуы мүмкін. Ал келтірілген зиянды өтеуге байланысты міндеттемелер шағын кәсіпорындар үшін елеулі қаржылық ауыртпалыққа айналуы ықтимал. Заңнамада кәсіби еңбекке қабілеттіліктен айырылу дәрежесіне қарай жауапкершілікті бөлу тәртібі қарастырылған. Егер еңбекке қабілеттіліктен айырылу деңгейі 5%-дан 29%-ға дейін болса, жоғалтқан жалақыны өтеу міндеті жұмыс берушіге жүктеледі. Ал бұл көрсеткіш 30%-дан 100%-ға дейін болған жағдайда тиісті төлемдерді белгіленген тәртіппен сақтандыру ұйымы жүзеге асырады. ЖОМС жүйесі жоғалтқан жалақыны өтеумен қатар, емделуге, дәрі-дәрмек сатып алуға, протездеуге, бөгде адамның күтіміне және шипажайлық-курорттық емделуге жұмсалған белгілі бір қосымша шығындарды да өтеуді көздейді. Соңғы жағдайда белгіленген талаптар сақталған кезде өтемақы мөлшері 100 айлық есептік көрсеткішке (АЕК) дейін жетуі мүмкін. Қызметкер қайтыс болған жағдайда сақтандыру төлемдері оның отбасы мүшелеріне және зиянды өтеуге құқығы бар өзге де адамдарға қаржылық қолдау көрсетеді. Бұл ретте сақтандыру ұйымының төлем жасау міндеттемелері бірнеше жыл бойы сақталуы мүмкін. 2026 жылы ЖОМС бойынша ең төменгі жылдық сақтандыру сыйлықақысы 85 мың теңгені құрайды. Ал оның нақты мөлшері кәсіпорынның еңбекақы төлеу қорына және кәсіби тәуекел класына байланысты айқындалады.

Сонымен қатар ЖОМС жүйесінің әлеуметтік маңызы жазатайым оқиғалардың салдарын өтеумен ғана шектелмейді. 2024 жылдан бастап жұмыс берушілерге өндірістік жарақаттанудың алдын алуға жұмсалған шығындардың сақтандыру сыйлықақысының 6%-ына дейінгі бөлігін өтеу мүмкіндігі қарастырылған. Бұдан бөлек, қызметкерлерді оңалтуға жұмсалған шығындарды өтеу тетігі де қолданылады. Бұл жағдайда да өтемақы мөлшері 6%-ға дейін төленеді. Екі жағдайда да белгіленген талаптар сақталып, нақты жұмсалған және тиісті құжаттармен расталған шығындар ғана өтеледі. Әлеуметтік қорғаудың тағы бір маңызды бағыты – 55 жасқа толған және ұзақ жылдар бойы зиянды еңбек жағдайларында жұмыс істеген азаматтарға арналған арнаулы әлеуметтік төлем.

2024 жылғы 1 қаңтардан бастап қолданысқа енгізілген бұл тетік белгіленген талаптарға сәйкес келетін қызметкерлерге зиянды еңбек жағдайларындағы жұмысын тоқтатуға немесе тәуекелі төмен жұмысқа ауысуға, сонымен қатар заңнамада көзделген әлеуметтік қолдауды сақтауға мүмкіндік береді. Сақтандыру жүйесінің қаржылық тұрақтылығын қамтамасыз ету тетіктері де қатар жетілдірілуде. 2025 жылғы ақпаннан бастап ЖОМС бойынша ірі тәуекелдерді бірлесіп бөлуге және ұзақ мерзімді міндеттемелердің орындалу сенімділігін арттыруға бағытталған бірыңғай қайта сақтандыру пулы жұмыс істейді. Оның құрамына өмірді сақтандыру саласында қызмет көрсететін тоғыз компания біріктірілген.

Сақтандыру қызметтерінің қолжетімділігі де артып келеді. 2026 жылғы қазанда Мемлекеттік аннуитеттік компания ЖОМС шарттарын онлайн режимде өз бетінше рәсімдеуге мүмкіндік беретін жаңа сервисті іске қосты. Енді жұмыс берушілер сақтандыру шарттарын электрондық цифрлық қолтаңбаны пайдалана отырып, қашықтан жасай алады. Алдағы уақытта жүйені дамыту Қазақстан Республикасының Қауіпсіз еңбек тұжырымдамасы аясында тәуекел деңгейіне қарай сараланған, неғұрлым икемді тариф белгілеу тәсіліне көшуді көздейді. Мұндай тәсіл жұмыс берушілердің кәсіби тәуекелдерді азайтуға және еңбек жағдайларын жақсартуға деген ынтасын арттыруға бағытталған.

Сақтандыру қорғанысының ауқымы кеңейіп келе жатқанын нарықтың сандық көрсеткіштері де дәлелдейді. Мәселен, 2021 жылы Қазақстанда ЖОМС бойынша 63 мың сақтандыру шарты жасалса, 2025 жылдың қорытындысы бойынша бұл көрсеткіш 154 мыңға жеткен. Ал 2026 жылғы 15 қарашадағы жағдай бойынша жасалған шарттар саны 204,4 мыңды құрап, өткен жылдың толық қорытындысынан асып түсті. Бүгінде ЖОМС бағдарламалары аясында 4 миллионнан астам қызметкер сақтандыру қорғанысымен қамтылған. Сонымен қатар сақтандыру сыйлықақыларының көлемі де ұлғайып келеді. 2021 жылы қайта сақтандыруды есепке алмағанда, сақтандыру сыйлықақыларының көлемі 41,2 млрд теңгені құраса, 2025 жылдың қорытындысы бойынша 139,3 млрд теңгеге жетіп, үш еседен астам өскен. Ал 2026 жылдың тоғыз айында ЖОМС бойынша сақтандыру сыйлықақыларының көлемі 111,8 млрд теңгені құрады. Сақтандырумен қамтуды кеңейту, төлем тетіктерін жетілдіру және өндірістік жарақаттанудың алдын алу шараларын дамыту қызметкерлерді әлеуметтік қорғау жүйесін нығайтуға ықпал етеді. Бұл жүйенің басты мақсаты – өндірістік тәуекелдердің салдарынан зардап шеккен азаматтар мен олардың отбасыларының қаржылық қолдаусыз қалмауын қамтамасыз ету, сондай-ақ жұмыс берушілердің қауіпсіз еңбек жағдайларын жасауға деген жауапкершілігі мен мүдделілігін арттыру.

Қазір оқылып жатыр

Толығырақ

Конституцияның қоғам өміріндегі маңызын сөз еткенде, азаматтардың мемлекеттік басқару ісіне қатысу құқығына ерекше назар аудару қажет. Себебі...

Как устроена работа уголовно-исполнительной системы, чем занимаются её сотрудники и какие возможности для бизнеса есть в исправительных учреждениях? Об этом узнали студенты...