Есірткі қылмысы елді алаңдатып отыр. Ұлт қауіпсіздігіне қатер төнгізетін бұл кеселмен күрес Түркістан облысы Полиция департаментінің қызметкерлері тарапынан тоқтаған емес, деп хабарлайды No-comment.kz ақпараттық агенттігі.
Мәселен тәртіп сақшыларының ағымдағы жылдың 10 айында есірткінің заңсыз айналымына қатысты 652 дерекке тосқауыл қойды. Оның 267-сі қылмыс болса, 385-і теріс қылық. Есірткі сату 42 дерек, аса ірі көлемде есірткі сақтау 13 дерек, құрамында есірткі заты бар өсімдіктерді өсіру 67 дерек, есірткіні, психотроптық заттарды заңсыз жарнамалау, насихаттау бойынша 8 дерек.
Полиция, прокуратура өңір жастарымен бірлесіп, 100-ге жуық есірткі жазбалары, яғни граффитилер жойды. Заңсыз айналымнан 335 келіге жуық есірткі заттары тәркіленді.
Есірткіні контрабандалық жолмен тасымалдаудың 137 арнасының жұмысы тоқтатылды. Мысалы контрабанданың 127-сі Өзбекстан шекарасынан Қазақстан аумағына өту кезінде анықталған. Ал 10 жайт ҚР-нан Өзбекстанға өту сәтінде жолы кесілді. Күдіктілердің 88-і өзбекстандық, 37-сі тәжікстандық болып табылады. Ал трамадолға қатысты 2 қылмыстық іс, 1 теріс қылық тіркелді. 1000 дана трамадол дәрісі тәркіленді.
Сондай-ақ есірткі қойып кетуші 34 тұрғын анықталып, олардан 4 келіден астам синтетикалық есірткі алынды.
Сонымен қатар тікұшақпен аудандарда есірткі егуге ықтимал жерлерге әуемен барлау жұмыстары жүргізілді.
