Білім мен тәрбиені ұштастырған педагог-зерттеуші

35 жылдық еңбек өтілі бар педагог-зерттеуші, №58 жалпы орта мектептің тәжірибелі ұстазы Сүлейменова Нуржамал Советқызы – шығармашылық ізденісімен көзге түсіп, шәкірттерін түрлі деңгейдегі ғылыми жобаларға баулып жүрген білікті маман.
С.М.Киров атындағы Қазақ мемлекеттік университетінің түлегі.
Негізгі мақсаты – оқушылардың шығармашылық және танымдық қабілеттерін дамыту.
«Ұлағатты ұстаз», «Қазақ елінің үздік ұстазы» төсбелгілері мен ҚР Білім министрлігі, Шымкент қаласы және облыстық білім басқармасының бірнеше Алғыс хат иегері.
Бес баланың аяулы анасы, он екі немересінің ардақты әжесі.
Ұрпақ тәрбиесіне өмірін арнаған ұстазға алғысымыз шексіз!
Сүлейменова Нуржамал Советқызы – шәкірт жүрегіне жол таба білген нағыз ұстаз, ұлт болашағы үшін аянбай еңбек етіп келе жатқан рухани жетекші. Ол сабақ үдерісінде тек білім берумен шектелмей, әр оқушының ішкі мүмкіндігін ашуға, оларды ойлануға, өз пікірін еркін жеткізуге, өмірмен байланыстыра отырып әрекет етуге баулиды. Танымдық белсенділік пен шығармашылық қабілетті дамыту – оның басты ұстанымдарының бірі.
Оқушыларын ғылыми-зерттеу жұмыстарына жүйелі түрде бағыттап, пәндік жобалар мен эссе байқауларына дайындауының арқасында шәкірттері түрлі деңгейдегі жетістіктерге қол жеткізіп келеді. Әрбір оқушының қабілетіне қарай жеке тәсілмен жұмыс істеп, олардың өзіне деген сенімділігін арттыра біледі. Бұл – мұғалімнің педагогикалық шеберлігінің айғағы.
Нуржамал Советқызы – әдістемелік бірлестіктің белсенді мүшесі, әріптестер арасында тәжірибе алмасуға ұйытқы болып жүрген ұстаз. Жас мамандарға тәлімгерлік жасап, білім беру үдерісін жетілдіруге қатысты әдістемелік кеңестер мен шығармашылық шеберханалар ұйымдастыруда. Ол тек шәкіртке ғана емес, мұғалімдер қауымдастығына да бағыт-бағдар беретін тұлға.
Ұжымда үлкен құрметке ие, ата-аналар мен оқушылар тарапынан жоғары бағаланатын Сүлейменова Нуржамал Советқызы – Шымкент қаласының әлеуметтік-демографиялық дамуына, сапалы білім мен тәрбиені қамтамасыз ету ісіне зор үлес қосып келе жатқан азамат. Оның қажырлы еңбегі – жас ұрпақтың жарқын болашағына бағытталған шынайы миссия. Осындай ұстаздардың арқасында қоғамда еңбек адамының мәртебесі артып, білім саласы үздіксіз дами береді.