Қолмен жасалған бұйым мен техникалық шеберлік – екеуі де үлкен еңбек пен дағдыны талап ететін кәсіп түрлері. Шымкент қаласында бұл бағыттарда табысты жұмыс істеп жүрген жандар аз емес. Олар өз еңбегі арқылы тек табыс тауып қана қоймай, жастарға үлгі боларлық іс жасап келеді.
Қолөнер — халқымыздың көнеден келе жатқан рухани мұрасы. Қазіргі таңда бұл саланы заманауи технологиялармен ұштастырып, кәсіп көзіне айналдырған жастардың саны артуда. Мысалы, шымкенттік Сахы Нұрсұлтан Әмірханұлы 4 жылдан бері ағаштан бұйымдар жасап, оны лазерлік қондырғы арқылы кесіп, өрнектеп, ұлттық нақыштағы ерекше заттар шығарумен айналысады. Оның жұмыстары сұранысқа ие болып, тапсырыс саны артуда. Мұндай шеберлік тек еңбек пен шыдамдылықтың жемісі.
Бүгінде қаланың түрлі аумақтарында орналасқан еңбек және кәсіпкерлікке бағытталған орталықтар арқылы жастар техникалық білім алып, өз ісін бастауға мүмкіндік алуда. 2025 жылдың бірінші жарты жылдығында Шымкентте 134 азаматқа 400 АЕК көлемінде қайтарымсыз грант берілді. Оның ішінде өндіріс, қолөнер, жиһаз жасау, кәдесый бұйымдары сынды бағыттар бойынша ондаған жоба мақұлданған. Бұл – мемлекет тарапынан жасалған үлкен қолдау.
Қаладағы техникалық және кәсіптік білім беру мекемелері де еңбек нарығына қажет шеберлерді дайындауға бағытталған. Жеңіл өнеркәсіп және сервис колледжі, Аграрлық колледж және басқа да оқу орындары өз түлектерін нақты жұмыс орындарына бағыттап, дуальды оқыту жүйесі арқылы тәжірибені теориямен ұштастырып отыр. Мұндай жүйе шебер маманның сапалы қалыптасуына ықпал етеді.
Шымкент қаласының әкімдігі тарапынан «Еңбек адамы» жылы аясында қолөнершілер мен техникалық мамандарға қолдау шаралары жалғасуда. Қалалық Жұмыспен қамту және әлеуметтік қорғау басқармасы жанындағы Еңбек мобильділігі орталығы арқылы қысқа мерзімді оқыту курстары ұйымдастырылып, жұмыссыз жүрген азаматтарға кәсіп үйренуге жол ашылды. Тек 2025 жылдың алғашқы алты айында 292 азамат жұмыс берушілердің негізінде оқуға жіберілді.
Қолөнер және техника — болашақта жойылып кетпейтін, керісінше, жаңарып, сұранысы арта түсетін салалар. Бұл бағытта жұмыс істеп жүрген азаматтар тек табыс емес, абырой да жинайды. Еңбектің қадірін біліп, істің шебері болуға ұмтылған шымкенттіктер бүгінгі қоғамда маңызды орынға ие.
Осындай мамандардың еңбегі – жас ұрпаққа үлгі, қоғамға қажет тәжірибе. Қолмен жасалған бұйым мен техникалық қабілетке сүйенген еңбек — нағыз адал табыстың бастауы. Шымкент бұл тұрғыда өз шеберлерімен мақтана алады.
