Шымкентте өтіп жатқан Әз Наурыздың бүгінгі Зияткерлік күні жастарды білімге, салт – дәстүрді құрметтуге, ұлттық құндылықтарымыз бен мәдениетімізді дәріптеуге бағытталған шаралармен айшықталуда.
Қала әкімі Мұрат Әйтенов Зияткерлік күніне орай А.Пушкин атындағы қалалық әмбебап кітапхана алаңындағы «Қош келдің әз – Наурыз!» мерекелік іс – шарасына қатысты.
Зиялы қауым өкілдері, ақын – жазушылар, кітапхана оқырмандары мен қала тұрғындары өскелең ұрпақты даналық пен парасаттылыққа шақыратын шаралар барысында зияткерлік ойындарды, кітап көрмелерін тамашалады.
Сондай-ақ қолөнер жәрмеңкесі мен ашық аспан аясындағы сурет көрмесінде ұлттық құндылықтарымыз ұлықталып, салт-дәстүріміз дәріптелді.
Ұлыстың Ұлы күні қарсаңындағы іс шарада ұлттық оркестр, ұлттық ән мен биден шеберлік сағаттары ұйымдастырылып, салт-дәстүр қойылымдары қойылды.
Наурыз мерекесіне орайластырылған «Қызыл Трактор» алдында концерт пен ауылдың алты ауызын шырқаған әжелердің әндері көпшілікке мерекелік көңіл күй сыйлады.
Қазақ халқында балалардың ой-санасын жетілдіру, зияткерлік қабілетін дамытуда ауыз әдебиетінің алар орны ерекше. Батырлар жыры балаларды Отансүйгіштікке, адалдыққа, ерлікке тәрбиелесе, шешендік өнер табан астында сөз тауып айтуға, аталы сөзге тоқтауға үйретеді.
Ал мақал мен мәтелдің орны тіптен ерекше. Мақал-мәтел арқылы бала тоқсан ауыз сөзді тобықтай түйінге сыйдыруды, өткеннен сабақ алуға машықтанады. Жаңылтпаш жаттаған баланың тілі жаттығып, есте сақтау қабілеті артып, топтың алдында еркін сөйлейтін болады. Ал жұмбақ жасырып, оны табу немесе ойдан жұмбақ құрастыру арқылы жеткіншектің қиялы өсіп, табиғат тылсымдарын ой елегінен өткізуге дағдыланады.
Қарап тұрсақ Зияткерлік күнін осындай аса бай мол мұрамызды пайдалану арқылы пайдалы әрі көңілді өткізуге болады. Ұлыстың Ұлы күні қарсаңында халық ауыз әдебиетін жаңғыртып, жас жеткіншектерге рухани азық сыйлайық. Ұлық мереке баршаңызға құтты болсын!
ЗИЯТКЕРЛІК КҮНІНДЕ ПАРАСАТТЫЛЫҚ ПЕН ДАНАЛЫҚ ДӘРІПТЕЛДІ
