Бүгін Атырау университетінде Қазақстан Республикасы Ұлттық спорт қауымдастығының вице-президенті Тастанбек Есентаевтың қатысуымен «Атырау облысындағы ұлттық спорт түрлерінің дамуы» тақырыбында жиын өтті.
Шараға ұлттық спорт түрлерінен Атырау облыстық федерация басшылары, аға жаттықтырушылар мен мамандар қатысты.
Атырау облыстық спорт басқармасы басшысының міндетін атқарушы Нұржауған Төлеуова облыстағы ұлттық спорт түрлерінің дамуы жөнінде баяндама жасап, статистикалық мәліметтерге жария етті. Н. Төлеуованың айтуынша, бүгінгі таңда өңірде ұлттық спорт түрлерімен шұғылданушылар саны 22 мыңға жуық адамды құрайды.
Сондай-ақ, жиында саладағы өзекті мәселелер талқыланып, оларды шешу жолындағы ұсыныстар айтылды.
ҚР Ұлттық спорт қауымдастығының вице-президенті Тастанбек Құтжанұлы алда атқарар жұмыстарына тоқталды.
«Мемлекет басшысы Қасым-Жомарт Тоқаев ұлттық спортты дамыту Тұжырымдамасын әзірлеуді және ұлттық спортымызды Олимпиадалық спорт түрлерімен терезесі теңдей етіп көтеру жайын, сонымен қатар, келесі жылы елімізде өтетін V-Көшпенділер ойындарын өте жоғары деңгейде өткізу керектігін тапсырған болатын.
Осы орайда, аталмыш Концепцияны әзірлеу үшін, ұлттық спорттағы заңнамалар мен ережелерге өзгерістер енгізуіміз үшін алыс-жақын шетелдерден және еліміздің барлық өңірлерінен кәсіби әрі білікті ғалымдар мен мамандарды жұмылдырып, жүйелі әрі сапалы жұмыс істейтін боламыз. Оған мына отырған сіздер де ат салысуларыңыз тиіс. Алда бізді үлкен жұмыстар күтіп тұр. Сол себептен баршаңызды бірлесе жұмыс істеуге шақырамын» деді Т. Есентаев.
Шара соңында жиынға қатысушылар алдағы уақытта ұлттық спорттың мәртебесін көтеру жолында қоян-қолтық жұмыс істеуге келісіп, нақты жұмыс жоспары арқылы барлық мәселелерді бірлесе шешуге уағдаласты.
