ТҮРКІСТАН: ҚР ДЕНСАУЛЫҚ САҚТАУ БІРІНШІ ВИЦЕ-МИНИСТРІ МЕДИЦИНАЛЫҚ ҰЙЫМДАРДЫ АРАЛАП, ЖҰРТШЫЛЫҚПЕН КЕЗДЕСУ ӨТКІЗДІ

Қазақстан Республикасының Денсаулық сақтау бірінші вице-министрі Тимур Сұлтанғазиев Түркістан облысына жұмыс сапары барысында бірқатар медициналық объектілерді аралады.
Алғашқы бару объектісі Арыс аудандық ауруханасы болды, онда ересектер мен балаларға кардиология, педиатрия, жалпы хирургия, травматология-ортопедия, оториноларингология, офтальмология, онкология, дерматовенерология,невропатология, психиатрия, наркология, жалпы дәрігерлік практика, акушерлік және гинекология сияқты бағыттар бойынша стационарлық және амбулаториялық-емханалық медициналық көмек көрсетіледі, стоматология, сондай-ақ емхананың күндізгі стационарлары мен үйдегі стационарлар жұмыс істейді.
Аудандық аурухана ұжымында 360-тан астам медицина қызметкері, оның ішінде 78 дәрігер жұмыс істейді. Аурухана басшылығымен әңгімелесуде кадрлық проблемалар талқыланды, атап айтқанда, аудандық деңгейде көз дәрігері, невропатолог дәрігер, кордиолог дәрігер, балалар психиатры, ультрадыбыстық дәрігер, акушер-гинеколог сияқты мамандардың тапшылығы байқалады.
Бірінші вице-министр ауылдық денсаулық сақтауды жаңғырту аясында МСАК дамытудың басым бағыттарына назар аударды. Осылайша, балалар мен жүкті әйелдерді патронаждау, диспансерлік науқастарды уақтылы диагностикалау және есепке қою, аудандық аурухана мамандарының ауылдық МСАК объектілерімен тиімді өзара іс-қимылы мәселелері көтерілді.
Бұдан әрі Т. Сұлтанғазиев штатында 878 қызметкер, оның ішінде 148 дәрігер, 567 орта медицина қызметкері жұмыс істейтін Сауран аудандық емханасының жұмысымен танысты. Мұнда медициналық жабдықтармен жарақтандыру мәселелері көтерілді, кадр тапшылығын шешу жолдары талқыланды.
Содан кейін денсаулық сақтаудың бірінші вице-министрі 376 төсекке арналған Түркістан қалалық орталық ауруханасына барды. Қалалық аурухананың штатында 128 дәрігер және 250-ден астам орта буын медицина қызметкерлері жұмыс істейді.
Кездесу барысында атап өтілгендей, аурухана базасында жоғары технологиялық медициналық көмек көрсету қарқынды дамып келеді, сонымен қатар гинекологиялық, гастроэнтерологиялық және проктологиялық бөлімшелердің ашылуы жоспарлануда.
Сапар барысында Тимур Сұлтанғазиев аурулардың профилактикасы бөлігінде, пациенттерді уақтылы диспансерлеу және контингентті ауруларды басқару бағдарламасымен кеңінен қамту бөлігінде жұмысты күшейту қажеттігін атап өтті, сондай-ақ ол бастапқы буындағы медициналық ұйымдарда пациенттерді қолдау қызметінің белсенділігін арттыруды ұсынды.
Бұдан әрі жұмыс сапары бағдарламасы шеңберінде денсаулық сақтау бірінші вице-министрі Түркістан облысының тұрғындарымен кездесулер өткізіп, азаматтарды жеке қабылдады.
Өңір жұртшылығымен кездесуде Т. Сұлтанғазиев медицина қызметкерлерінің кәсіптік жауапкершілігін күшейтуге, пациенттердің құқықтарын қорғауға, қоғамдағы дәрігерлер мәртебесін нығайтуға бағытталған күтілетін заңнамалық жаңалықтар туралы хабардар етті. Ол сондай-ақ ведомствоның амбулаториялық деңгейде дәрі-дәрмекпен қамтамасыз етуді жақсарту, кадр саясаты, «Аңсаған сәби» арнайы бағдарламасын іске асыру нәтижелері, оның шеңберінде 2026 жылға дейін ЭКҰ-ға жыл сайын 7000 квота бөлу көзделгені туралы айтып берді.
Оңтүстік өңірдегі кездесуге қатысушыларды электрондық портал арқылы емдеуге жатқызуды ұзақ күту және жедел медициналық жәрдем жұмысын ұйымдастыруға қатысты арнайы мамандарды қабылдау мәселелері толғандырды, жүрек-қан тамырлары аурулары бойынша Медициналық орталық салу қажеттігі туралы өтініштер айтылды, адамдар ауылдағы медициналық қызмет көрсету деңгейі бойынша шағымдар айтты, дәрілік препараттардың болмауы жағдайларымен жұмыс істеуді сұрады.
Жеке қабылдау барысында азаматтар мүгедектік тобын тағайындауға, дәрі-дәрмекпен қамтамасыз етуге қатысты сұрақтар қойды.
Барлық айтылған өтініштер мен сұрақтарға бірінші вице-министр толық жауаптар мен түсініктемелер берді, бейінді департаменттерге жүгінген азаматтарға қажетті жәрдем көрсетуді тапсырды.
Күн соңында Тимур Сұлтанғазиев жергілікті және республикалық БАҚ өкілдерінің аурухана инфрақұрылымын дамытуға, аурухана құрылысына, халыққа медициналық көмек көрсету сапасына қатысты сұрақтарына жауап берді, деп хабарлайды Түркістан облысы әкімінің баспасөз қызметіне сілтеме жасаған no-comment.kz.