Арыс қаласының әкімі Гүлжан Құрманбекова Ақдала ауылы тұрғындарымен кездесті. Бүгін ғана ашылған су жаңа мәдениет үйінде өткен кездесуге қалалық мәслихат төрағасы Қайрат Ахметов, сала басшылары мен ауыл тұрғындары қатысты.
Шаһар басшысы алдымен атқарылған негізгі жұмыс-жоспарлар турасында қысқаша баяндады. Жиын негізінен сұрақ-жауап үлгісінде, ашық диалог форматында өтті.
«Былтыр өздеріңізбен кездесуде ауыл клубы мен кітапхана, және спорт зал кешенін салып беруді сұраған болатынсыздар. Бүгін, ұсыныстарыңызға сәйкес, 240 орындық клуб пен кітапхана комплексі пайдалануға беріліп отыр. Енді ауылдан спорт зал салу үшін жобалық сметалық құжаттамасы әзірленіп, республикалық бюджетке қаржыға ұсыныс енгізілді. Ендігі мақсат - ауыл ішіндегі дарынды, талантты балаларды үйірмеге тартып, бойындағы жасырынып жатқан өнерін жандандыру,» - деді шаһар басшысы.
Кездесуде қала әкімі ауыл тұрғындарының табысын арттыруға бағытталған «Ауыл – аманаты» жобасына ерекше тоқталып өтті. Аталған бағдарламаға Ақдала ауылынан бүгінгі таңғы есеп бойынша 43 жоба несие комитетіне ұсынылып, 29 жобаға 135,4 млн. теңге оң қорытынды берілген. Шаһар басшысы ауылдастарды жылдық мөлшері 2,5 пайыздан аспайтын бірегей жобаға қатысып, мүмкіндікті жіберіп алмауға шақырды.
Ақдалада инфрақұрылымдық мәселелер де шешімін тауып келеді. Мәселен, округке қарасты П.Арапов елді мекенінде биыл 1 дана трансформатор жаңартылып берілді. Қазіргі таңда Ақдала ауылында 5,3 шақырым электр желілері мен ескірген 1 трансформатор ауыстыру жұмыстары жүргізілуде.
Ал, Ақдала, П.Арапов елді мекендерін табиғи газбен қамтамасыз ету үшін жобалық сметалық құжаттамасы әзірленіп, 2024-2025 жылдары құрылыс жұмыстарын жүргізу жоспарлануда.
Сондай-ақ, биыл Ақын-Жақып кесенесін абаттандыру жұмыстары жүргізіледі. Қазіргі таңда мердігер анықталып, келісім шарт түзілуде.
Кездесуден соңы жеке қабылдауға ұласып, ауылдастар әлеуметтік көмек, балалар ойын алаңшасы, тұрақты жұмыс сынды мәселер айтылып, қала әкімі Гүлжан Құрманбекова тарапынан нақты жауаптар берілді.
Айта кететін, Қазақстан Президенті Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында мемлекеттік институттардың рөлін нығайту, азаматтардың құқықтары мен бостандықтарын қорғау, халықтың тұрмыс сапасын жақсарту мәселелерін кеңінен сөз етті. Жолдауда қазіргі әлеуметтік-экономикалық жағдайға жан-жақты, терең талдау жасап қана қоймай, оның шешу жолдарын да көрсетіп берді.
Ұлттық құрылыстың қазіргі кезеңінде Қазақстан Республикасы қарқынды саяси өзгерістер кезеңін бастан кешіп жатыр. Саяси модернизацияның тұжырымдамалық фрейміне «Халық үніне құлақ асатын мемлекет» моделі арқау болды. «Listening State» («Құлақ асатын/еститін мемлекет») — бұл үкіметтің азаматтармен өзара әрекеттесу, оларды толғандыратын мәселелер мен қажеттіліктерін түсіну бойынша белсенді күш-жігеріне баса назар аударатын мемлекеттік саясат тұжырымдамасы. Бұл тұжырымдама үкімет пен қоғам арасындағы ашық әрі айқын байланыс арналарын құруды көздеп, шешімдерді әзірлеу және қабылдау процесінде азаматтардың дауысын естуге және ескеруге бағытталған.
«Халық үніне құлақ асатын мемлекет» тәсілі ақпаратты жай ғана тарату немесе «жоғарыдан төменге» саясатын жүзеге асыруға қарағанда, тиімді басқару бұдан да көп нәрсені қажет ететінін көрсетеді. Яғни кері байланыс, идеялар мен қоғамдық пікірді белсенді іздеудің маңызын мойындайды. Бұған қол жеткізуге жәрдемдесетін түрлі құралдар бар: қоғаммен кеңесу, сауалнамалар, жалпы жиналыстар, онлайн форумдар және басқа да қатысу тетіктері.
«Халық үніне құлақ асатын мемлекетте» Үкімет азаматтарға ойларымен, идеяларымен және пікірлерімен алмасу үшін қолжетімді және ыңғайлы платформалар ұсынады. Бұл сандық платформалар және қоғамдық жиналыстар сияқты құралдар арқылы немесе т.б. жүзеге асырылуы мүмкін.
Мемлекеттік органдар мен азаматтар арасындағы өзара іс-қимылдың жаңа форматтарын қолдануды жеке үрдіс деп атауға болады. Мемлекеттік органдар жедел хабар алмасу құралдарын пайдаланады, чат боттарын жасайды. Жергілікті атқарушы органдар өтініштерді қарау мен азаматтарды қабылдауды бір жерде жүргізген жағдайда қызмет көрсету «кедергісіз орта» қағидаттары бойынша «ашық қабылдау» арқылы жұмыс істейді.
АРЫС: ҚАЛА ӘКІМІ Г.ҚҰРМАНБЕКОВА АҚДАЛА ЖҰРТШЫЛЫҒЫМЕН КЕЗДЕСТІ
