Алматы әкімі Ерболат Досаев Алмалы ауданының тұрғындарымен есептік кездесу барысында ауданда тұрғындарды сапалы медициналық қызметтермен қамтамасыз ету мәселелері белсенді түрде шешіліп жатқанын атап өтті, деп хабарлайды No-comment.kz ақпарат агенттігі.
Алматыда ерекше қажеттіліктері бар балаларға арналған жаңа спорт орталығы салынады. Жаңа нысан Райымбек батыр даңғылы, 312 мекен-жайында орналасады. Жобада ерекше қажеттіліктері бар адамдар үшін сауықтыру-жаттығу сабақтарына арналған көпфункционалды спорт орталығын салу көзделген. Сондай-ақ, онда 2 бассейн бар. Жобалық қуаты бір ауысымда 144 адамды құрайды.
Құрылыс жұмыстары 2025 жылдың 1 тоқсанында басталып, 2025 жылдың соңында аяқталады.
Сонымен қатар, әкім атап өткендей, биыл екі әлеуметтік нысанға күрделі жөндеу жұмыстары басталды, онда 2010 жылдан бері жөндеу жұмыстары жүргізілмеген. Осы жылдың шілде айында қалалық Адам репродукциясы орталығына жөндеу жұмыстары басталды. №1 блоктағы жөндеу жұмыстары осы жылдың желтоқсанында, ал №2 блокта 2025 жылдың наурызында аяқталады.
Сондай-ақ, осы жылдың желтоқсан айында №3 емхана ғимаратына күрделі жөндеу жұмыстары аяқталады.
