Қазақстан Республикасы Экология және табиғи ресурстар министрлігі «Мұнай-газ секторында метан шығарындыларын басқарудың кешенді тәсілі: мониторингтен тиімді қысқартуға дейін» атты семинарға қатысты. Іс-шараны Karachaganak Petroleum Operating B.V. (КПО) компаниясы Қазақстан Республикасы Энергетика министрлігімен бірлесе ұйымдастырды, деп хабарлайды No-comment.kz - ҚР Экология және табиғи ресурстар министрлігіне сілтеме жасап.
Семинарға салалық мемлекеттік органдардың өкілдері, мұнай-газ секторының ірі операторлары, салалық қауымдастықтар, жетекші талдамалық агенттіктер мен бизнес-серіктестер қатысты.
Бұл алаң метан шығарындыларын бақылау, есепке алу және азайту саласындағы қазіргі заманғы тәжірибемен алмасуға және өзекті мәселелерді талқылауға мүмкіндік берді. Метан — климаттың өзгеруіне зор ықпал ететін ең қуатты парниктік газдардың бірі болып табылады.
Семинар барысында Қазақстан үшін технологиялық шешімдерді енгізу мен метан шығарындыларын төмендетуге бағытталған нормативтік-құқықтық базаны күшейту мәселелері қаралды. Мемлекеттік органдар мен бизнес арасындағы өзара іс-қимылды жолға қою, сондай-ақ халықаралық стандарттарды ұлттық басқару жүйесіне енгізу мәселелеріне ерекше назар аударылды.
Семинар қорытындысы бойынша Энергетика министрлігі мұнай-газ саласындағы барлық мүдделі тараптармен тығыз ынтымақтастықта іске асырылатын басым міндеттерді жариялады.
