Шағын және орта бизнесті қолдау бағытында елімізде жүзеге асырылып жатқан бастамалар Шымкент қаласында да қарқын алуда. Биыл 28 жылдығын атап өтіп жатқан «Даму» кәсіпкерлікті дамыту қоры өңірлік кәсіпкерлер үшін бірқатар жаңа қызмет түрлерін іске қосып, бизнес жүргізуге қолайлы жағдай қалыптастыруда.
1997 жылы құрылған бұл Қор бүгінде еліміздегі кәсіпкерлік саласының басты серіктестерінің біріне айналған. Қордың жалғыз акционері – «Бәйтерек» ұлттық басқарушы холдингі» АҚ. Ұйымның басты мақсаты – 2033 жылға дейінгі кезеңде микро, шағын және орта бизнесті жүйелі түрде қолдау арқылы олардың тұрақты дамуына жағдай жасау.
Шымкент қаласы – кәсіпкерлік белсенділігі жоғары өңірлердің бірі. Мұнда кәсіпкерлердің басым бөлігі сауда, қызмет көрсету, құрылыс және өндіріс салаларында еңбек етуде. Алайда, көп жағдайда бизнес бастау немесе кеңейту кезінде негізгі кедергілердің бірі – кепілзаттың жеткіліксіздігі. Осы мәселені шешу үшін «Даму» қоры екі жаңа кепілдік құралын енгізді.
Бірінші кепілдік құралы шағын, орта және ірі кәсіпкерлерге бағытталған. Бұл механизм арқылы:
-
Қаржыландыру сомасы — 7 млрд теңгеге дейін;
-
Кепілдік мөлшері — 85%-ға дейін (бірақ 3,5 млрд теңгеден аспайды);
-
Қаржыландыру мақсаты — айналым қаражатын толықтыру, инвестиция, бұрынғы несиелерді қайта қаржыландыру;
-
Мерзімі — 5 айға дейін ұзартылған қаржыландыру мерзімімен тең.
Екінші кепілдік құралы — ірі инвестициялық жобаларға арналған:
-
Қаржыландыру көлемі — 7 млрд теңгеден жоғары;
-
Кепілдік мөлшері — жобаның 30%-ына дейін;
-
Мерзімі — 15 жылға дейін;
-
Мақсатты салалар — өңдеу және тау-кен өнеркәсібі, агроөнеркәсіп, энергетика, көлік, байланыс, туризм, білім, денсаулық сақтау.
Бұл құралдардың тиімділігі – Шымкенттегі өндірістік және инновациялық жобаларды іске асыруға жол ашуында. Өңірде жаңа жұмыс орындарын ашуға, инфрақұрылымды дамытуға және инвестиция тартуға тікелей ықпал етеді.
Кепілдіктерден бөлек, «Даму» қоры Шымкенттегі кәсіпкерлерге кеңес беру қызметтерін, қаржылық сауаттылықты арттыру бойынша тренингтерді, сондай-ақ онлайн оқыту платформаларын ұсынады. Қордың Шымкенттегі аймақтық филиалы арқылы барлық қызмет түрлерін жергілікті жерде, ыңғайлы әрі жедел түрде алуға болады.
Сонымен қатар, Қор өңірдегі банктермен, лизингтік компаниялармен және мемлекеттік бағдарламалармен тығыз байланыста жұмыс істеп, кәсіпкерлерге кешенді қолдау ұсынады. Шағын бизнес өкілдерінен бастап, ірі өндірістік жобаларды жүзеге асырып жатқан кәсіпкерлерге дейін «Даму» қоры тарапынан жан-жақты қолдау қарастырылған.
Осылайша, Шымкент қаласындағы кәсіпкерлер үшін жаңа мүмкіндіктер көкжиегі кеңейіп келеді. Қор ұсынған қолдау тетіктері бизнестің дамуына серпін беріп, өңірдің экономикалық әлеуетін арттыруға бағытталып отыр.
