Курчатов қаласында қуаты 700 МВт болатын жаңа конденсациялық электр станциясының іргетасы қаланды. Абай облысының энергетикалық инфрақұрылымын дамытуға бағытталған ірі жобаны 2026–2032 жылдары жүзеге асыру жоспарланған. Инвестиция көлемі 881 миллиард теңгені құрайды.
Станция толық іске қосылғанда жылына 5 миллиард кВт·сағатқа дейін электр энергиясын өндіруге мүмкіндік береді. Жоба елдің бірыңғай энергетикалық жүйесінің тұрақтылығын күшейтіп, жаңа генерация қуаттарын қалыптастыруға және электр энергиясы тапшылығы тәуекелдерін төмендетуге бағытталған.
Құрылыс өңір экономикасына да елеулі серпін бермек. Жұмыс барысында 5 мыңға дейін адам еңбекпен қамтылып, нысан пайдалануға берілген соң 400 тұрақты жұмыс орны құрылады. Бұл Курчатовтың индустриялық дамуына, жергілікті кәсіпкерліктің белсенділігіне және инфрақұрылымның жаңаруына қосымша мүмкіндік береді.
Облыс әкімі Берік Уәли жобаның Мемлекет басшысы Қасым-Жомарт Тоқаев айқындаған энергетикалық тәуелсіздікті нығайту және жаңа генерация көздерін іске қосу міндеттерімен сабақтас екенін атап өтті.
Абай облысында энергетикалық қуатты арттыруға бағытталған өзге де жобалар жоспарланған. Қазіргі Шүлбі су электр станциясының қуаты 702 МВт болса, екінші кезең жүзеге асқанда көрсеткіш 1050 МВт-қа жетпек. Сонымен қатар қуаты 350 МВт Семей су электр станциясын және 360 МВт ЖЭО-3 салу көзделген.
Бірнеше жобаның қатар іске асырылуы өңірдегі генерация көздерін әртараптандыруға мүмкіндік береді. Бұл әсіресе су көлеміне тәуелді гидроэнергетиканың мүмкіндігін басқа қуат көздерімен толықтыру тұрғысынан маңызды. Курчатовтағы жаңа станция осы жүйенің маңызды буынына айналып, Абай облысының ел энергетикасындағы рөлін күшейтпек. Жоба инвестициялық тартымдылықты арттырып, өнеркәсіптік кәсіпорындарды тұрақты энергиямен қамтамасыз етуге және болашақ өндірістер үшін қажетті қуат қорын қалыптастыруға негіз болады.
